जळगाव, (प्रतिनिधी) : शहरातील आकाशवाणी चौकातील एका ट्रॅव्हल्स ऑफिससमोरून कुरिअरचे बॉक्स चोरी करणाऱ्या एका विधीसंघर्षित बालकाला (अल्पवयीन मुलगा) जिल्हापेठ पोलिसांनी ताब्यात घेतले आहे. त्याच्याकडून पोलिसांनी ९६ हजार ९९६ रुपये किमतीचे विविध कंपन्यांचे ४ महागडे मोबाईल हस्तगत केले आहेत.
आकाशवाणी चौकातील श्री स्वामी ट्रॅव्हल्सच्या ऑफिससमोरून ५ मोबाईल असलेले कुरिअरचे बॉक्स चोरीला गेल्याची घटना घडली होती. याप्रकरणी जिल्हापेठ पोलीस ठाण्यात गुन्हा दाखल करण्यात आला होता. गुन्ह्याचे गांभीर्य ओळखून जिल्हापेठ पोलीस ठाण्याचे प्रभारी अधिकारी यांनी तपास पथक तयार केले होते.
तपासादरम्यान तांत्रिक विश्लेषण आणि गोपनीय माहितीच्या आधारे पोलिसांना एका अल्पवयीन मुलावर संशय आला. त्याला ताब्यात घेऊन विश्वासात घेत विचारपूस केली असता, त्याने चोरीची कबुली दिली. त्यानंतर त्याने चोरून नेलेले ४ मोबाईल पोलिसांच्या स्वाधीन केले.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे, आणि प्रभारी अधिकारी अनिल वाघ यांच्या मार्गदर्शनाखाली पोह महेंद्र पाटील, नरेश सोनवणे, संतोष सोनवणे, तेजस मराठे, प्रविण जाधव, प्रशांत लाड आणि चंद्रकांत पाटील यांच्या पथकाने केली आहे. या गुन्ह्याचा पुढील तपास पोह महेंद्र पाटील करत आहेत.
