जळगाव, (प्रतिनिधी) : जळगाव शहर महानगरपालिकेच्या सत्तेची सूत्रे हाती घेतल्यानंतर, प्रशासकीय कामकाजात अत्यंत कळीच्या मानल्या जाणाऱ्या स्थायी समिती आणि महिला व बालकल्याण समितीच्या सदस्यांची निवड सोमवारी (दि.१६ फेब्रुवारी) विशेष महासभेत करण्यात आली. महायुतीने आपले वर्चस्व राखत स्थायी समितीच्या १६ जागांपैकी १५ जागांवर कब्जा मिळवला आहे. पहिल्या वर्षी विकासकामांना गती देण्यासाठी तिन्ही प्रमुख पक्षांनी अनुभवी चेहऱ्यांवर विश्वास दर्शवला आहे.
महानगरपालिकेत महायुतीची सत्ता स्थापन झाल्यानंतर महापौर दीपमाला काळे आणि उपमहापौर मनोज चौधरी यांनी पदभार स्वीकारला होता. त्यानंतर तातडीने विषय समित्यांच्या निवडीसाठी विशेष महासभा बोलावण्यात आली होती. या सभेच्या व्यासपीठावर महापौर, उपमहापौर यांच्यासह आयुक्त ज्ञानेश्वर ढेरे आणि नगरसचिव शुक्ला यांची उपस्थिती होती.
स्थायी समिती: भाजपचे पारडे जड..
स्थायी समितीसाठी भाजप, शिवसेना (शिंदे गट) आणि शिवसेना (ठाकरे गट) यांच्याकडून बंद पाकिटात नावे सादर करण्यात आली. महापौर दीपमाला काळे यांनी या नावांचे वाचन केले. १६ सदस्यीय स्थायी समितीमध्ये भारतीय जनता पक्षाचे १०, शिवसेनेचे ५ आणि शिवसेना ठाकरे गटाच्या १ सदस्याचा समावेश आहे. महापालिकेच्या तिजोरीच्या चाव्या ज्या समितीकडे असतात, त्या स्थायी समितीवर भाजपने आपले पूर्ण वर्चस्व सिद्ध केले आहे.
महिला व बालकल्याण समिती..
महिला व बालकल्याण समितीच्या ९ सदस्यांचीही यावेळी घोषणा करण्यात आली. यात भाजपचे ५, शिवसेनेचे ३ आणि ठाकरे गटाच्या १ सदस्याची वर्णी लागली आहे. निवडीनंतर सभागृहात सर्व नवनियुक्त सदस्यांचे पुष्पगुच्छ देऊन अभिनंदन करण्यात आले.
आता लक्ष सभापती निवडीकडे..
सदस्यांची निवड प्रक्रिया पूर्ण झाली असली, तरी दोन्ही समित्यांच्या सभापतींची निवड आता विभागीय आयुक्तांच्या कार्यालयात होणार आहे. या पदांसाठी कोणाची वर्णी लागते, याकडे आता राजकीय वर्तुळाचे लक्ष लागले असून, येत्या काही दिवसांत पक्ष नेतृत्वाकडून या हालचालींना वेग येणार आहे.
निवड झालेले सदस्य खालीलप्रमाणे:
स्थायी समिती सदस्य (१६):
भाजप: दीपक सूर्यवंशी, नितीन लढ्ढा, विशाल भोळे, डॉ. चंद्रशेखर पाटील, सुरेश सोनवणे, अरविंद देशमुख, कल्पेश सोनवणे, मानसी भोईटे, वंदना इंगळे, नितीन सपके.
शिवसेना: विष्णू भंगाळे, दिलीप पोकळे, नरेंद्र पाटील, गणेश सोनवणे, सागर सोनवणे.
शिवसेना (ठाकरे गट): इब्राहिम पटेल.
महिला व बालकल्याण समिती सदस्य (९):
भाजप: सुरेखा नितीन तायडे, रंजना विजय वानखेडे, पूजा विजय जगताप, विद्या मुकुंदा सोनवणे, गायत्री राणे.
शिवसेना: सिंधु कोल्हे, प्रतिभा देशमुख, डॉ.अमृता सोनवणे.
शिवसेना (ठाकरे गट): हिनाबी शाकीर खान.
