जळगाव, (प्रतिनिधी) : राष्ट्रवादी काँग्रेस (शरद पवार) पक्षाचे ज्येष्ठ नेते आमदार एकनाथ खडसे यांच्या अडचणीत वाढ झाली असून, पोलीस अधिकाऱ्याला दमदाटी करणे आणि सरकारी कामात अडथळा आणल्याप्रकरणी त्यांच्याविरुद्ध बुधवारी सायंकाळी सावदा पोलीस ठाण्यात गुन्हा दाखल करण्यात आला आहे. मंत्र्यांविरोधात अश्लील भाषेचा वापर केल्याचाही ठपका त्यांच्यावर ठेवण्यात आला आहे.
सहायक पोलीस निरीक्षक विशाल पाटील यांनी दिलेल्या फिर्यादीनुसार, ही घटना बुधवारी दुपारी सावदा पोलीस ठाण्याच्या प्रवेशद्वारावर घडली. तासखेडा (ता. रावेर) येथील गौण खनिज प्रकरणात अद्याप गुन्हा का दाखल केला नाही, असा जाब विचारण्यासाठी खडसे पोलीस ठाण्यात आले होते. खडसे यांनी पोलीस ठाण्याच्या गेटवरच अधिकाऱ्यांना बोलावून मोठ्या आवाजात आरडाओरडा केला. “तुम्ही कोट्यवधी रुपये खाल्ले आहेत,” असे म्हणत त्यांनी पोलिसांवर भ्रष्टाचाराचे गंभीर आरोप केले.
या प्रकरणात २९ जानेवारी २०२६ रोजीच गुन्हा दाखल झाल्याची माहिती पोलिसांनी दिली. मात्र, तपास सुरू असल्याने खडसे यांनी मागितलेली कागदपत्रे देण्यास पोलिसांनी नकार दिला. यामुळे खडसे अधिकच संतप्त झाले.
पोलिसांनी सहकार्य नाकारल्याने खडसे यांनी आक्रमक पवित्रा घेतला. “आगामी अधिवेशनात तुम्हाला बघून घेतो” आणि “तुमच्यावर अँटी करप्शनचा (ACB) ट्रॅप लावतो,” अशी धमकी त्यांनी अधिकाऱ्यांना दिली असल्याचे फिर्यादीत नमूद करण्यात आले आहे. तसेच, संबंधित गुन्ह्याच्या संदर्भात बोलताना त्यांनी एका मंत्र्यांविरोधात अत्यंत अश्लील आणि अपमानास्पद शब्दांचा वापर केल्याचाही आरोप आहे.
पहा काय म्हणाले आ. खडसे
या सर्व प्रकारानंतर सहायक पोलीस निरीक्षक विशाल पाटील यांनी वरिष्ठ अधिकाऱ्यांकडे दाद मागितली. त्यांच्या तक्रारीवरून सावदा पोलिसांनी आमदार एकनाथ खडसे यांच्याविरुद्ध सरकारी कामात अडथळा, शिवीगाळ आणि दमदाटी केल्याप्रकरणी विविध कलमान्वये गुन्हा नोंदवला आहे.
