जळगाव, (प्रतिनिधी) : शेती साहित्यावरील सबसिडीचे अनुदान मिळवून देण्यासाठी ६ हजार रुपयांच्या लाचेची मागणी करून ५ हजार रुपये स्वीकारणाऱ्या पाचोरा येथील उप कृषी अधिकाऱ्यासह दोन खासगी इसमांविरुद्ध लाचलुचपत प्रतिबंधक विभागाने (एसीबी) सोमवारी, २ फेब्रुवारी रोजी यशस्वी सापळा रचून कारवाई केली. या कारवाईमुळे शासकीय वर्तुळात मोठी खळबळ उडाली असून भ्रष्ट अधिकाऱ्यांचे धाबे दणाणले आहेत.
यात लिलाधर शिवाजीराव देशमुख (उप कृषी अधिकारी, वर्ग-३, पाचोरा), संजय प्रभाकर पाटील (मालक, धनदाई कृषी केंद्र, आंबेवडगाव), नितीन इंदलसिंग निकम (मदतनीस) यांच्या ही कारवाई करण्यात आली आहे.
आंबेवडगाव (ता. पाचोरा) येथील एका शेतकऱ्याने शासकीय योजनेअंतर्गत नांगर आणि रोटर खरेदी केले होते. या साहित्याचे अनुदान (सबसिडी) मिळवण्यासाठी त्यांनी पाचोरा कृषी कार्यालयाकडे ऑनलाईन अर्ज केला होता. साहित्याचे फोटो काढून ते पोर्टलवर अपलोड करणे आणि अनुदान मंजूर करण्याच्या बदल्यात उप कृषी अधिकारी लिलाधर देशमुख यांनी ६ हजार रुपयांच्या लाचेची मागणी केली होती. तडजोडीअंती ५ हजार रुपये देण्याचे ठरले.
देशमुख यांनी लाचेची रक्कम आंबेवडगाव येथील धनदाई कृषी केंद्राचे मालक संजय पाटील यांच्याकडे देण्यास सांगितली होती. तक्रारदार शेतकऱ्याने याप्रकरणी जळगाव एसीबीकडे धाव घेतली. सोमवारी एसीबीच्या पथकाने पडताळणी केली असता लाचेची मागणी सिद्ध झाली. संजय पाटील दुकानावर नसल्याने, त्यांच्या सांगण्यावरून दुकानातील मदतनीस नितीन निकम याने ५ हजार रुपये स्वीकारले. पैसे स्वीकारताच दबा धरून बसलेल्या एसीबीच्या पथकाने त्यांना रंगेहात पकडले.
