जळगाव, (जिमाका वृत्तसेवा) : थंड हवेमुळे प्रसिद्ध असलेल्या पाल परिसरातील पर्यटन विकासाला चालना देण्यासाठी जिल्हाधिकारी रोहन घुगे यांनी नुकतीच या भागाची सविस्तर पाहणी केली. त्यांनी पाल येथील गार्डन, वन उद्यान, विश्रामगृह, डॉरमेट्री आणि पर्यटक निवास यांसह वन विभागातर्फे सुरू करण्यात आलेल्या सातपुडा जंगल सफारीचा पाहणी दौरा करून तेथील सर्व सुविधा आणि चालू कामांचा सविस्तर आढावा घेतला.
जिल्हाधिकाऱ्यांनी पाल परिसरात पर्यटनाची मोठी क्षमता असल्याचे या वेळी नमूद केले. गावापासून सहा किलोमीटर अंतरावर वन विभागाने सुरू केलेल्या सातपुडा जंगल सफारीतील कामांची त्यांनी विशेष पाहणी केली. या सफारीमुळे स्थानिक ग्रामस्थांना वन व्यवस्थापन समिती मार्फत उपलब्ध झालेल्या रोजगाराविषयी त्यांनी थेट कर्मचाऱ्यांशी संवाद साधून त्यांचे अनुभव जाणून घेतले.
पाहणीदरम्यान जिल्हाधिकाऱ्यांनी उद्यानाच्या पुढील विस्तार आणि विकासासाठी आवश्यक सूचना दिल्या. तसेच, जंगल सफारीतील मार्गदर्शक व्यवस्था, वाहतूक, सुविधा विस्तार, पर्यटकांसाठी सुरक्षितता आणि पर्यावरण संवर्धन याबाबत काही सुधारणा सुचवून पर्यटन विकासाला गती देण्याचे निर्देश दिले.
यावेळी उपवनसंरक्षक जमीर शेख, सहाय्यक वनसंरक्षक समाधान पाटील, वनपरिक्षेत्र अधिकारी श्रीकांत काळे प्रोजेक्ट ऑफिसर यावल यांच्यासह अन्य अधिकारी या पाहणी दौऱ्यात उपस्थित होते.
