जळगाव, (प्रतिनिधी) : दि इन्स्टिट्यूट ऑफ चार्टर्ड अकौंटंट ऑफ इंडिया (ICAI) च्या जळगाव शाखेस बुधवार, दि. १२ नोव्हेंबर २०२५ रोजी मुंबई विभागाच्या वेस्टर्न इंडिया रिजनल कौन्सिल (WIRC) च्या कार्यकारी मंडळाने भेट दिली. WIRC चे अध्यक्ष सी.ए. केतन सैया, उपाध्यक्ष सी.ए. पियुष चांडक, कोषाध्यक्ष सी.ए. फेनिल शाह आणि जळगाव शाखेचे पदाधिकारी या वेळी उपस्थित होते.
‘अकाउन्टींग म्युझियम’चे लोकार्पण
दिवसभरातील कार्यक्रमाचा मुख्य आकर्षण म्हणजे पालकमंत्री ना. गुलाबराव पाटील यांच्या हस्ते जीपीएस कॅम्पस, पाळधी येथे अकाउन्टींग म्युझियमचे लोकार्पण झाले. श्री. पाटील यांनी हे म्युझियम ज्ञान, पारदर्शकता आणि व्यावसायिकतेचे प्रतीक असून, ते संपूर्ण देशातील ICAI शाखांसाठी प्रेरणादायी ठरेल असे मत व्यक्त केले.
मुंबई WIRC टीमने यावेळी पत्रकार परिषद घेतली. यात सी.ए. केतन सैया यांनी ICAI तर्फे राबविण्यात येणाऱ्या महत्त्वाच्या उपक्रमांची माहिती दिली. यात सदस्य व विद्यार्थ्यांसाठी आर्टिफिशियल इंटेलिजन्स (AI) कोर्स, वित्तीय साक्षरता अभियान, जीएसटी, इन्कम टॅक्स, सायबर फ्रॉड यावर मार्गदर्शन, ‘ट्रेन अर्न लर्न’ कोर्स आणि करिअर कॉन्सिलिंग प्रोग्राम घेण्यात येत असल्याचे सांगत प्रत्येक शाळेत अकाउन्टींग म्युझियम आणि प्रत्येक जिल्ह्यात सी.ए. विद्यार्थ्यांसाठी वाचनालय सुरू करण्याची इच्छा व्यक्त केली.
दिवसभरातील कार्यक्रमाची सुरुवात पांजरापोळ गौशाळेत “सामुहिक गौसेवा” आणि वृक्षारोपण करून झाली. तसेच सी.ए. फायनल व इंटरमिजीएट परीक्षेत उत्तीर्ण विद्यार्थ्यांचा सत्कार करण्यात आला. शेठ लालजी नारायणजी सार्वजनिक विद्यालयात शारदा नेत्रालय व CA शाखेच्या संयुक्त विद्यमाने १५०० विद्यार्थ्यांसाठी नेत्र तपासणी शिबिराचे आयोजन करण्यात आले.
WIRC टीमने जळगाव शाखेच्या कार्यातील ऊर्जा आणि सामाजिक बांधिलकीची प्रशंसा केली, तर जळगाव शाखेचे अध्यक्ष सी.ए. हितेश आगीवाल यांनी या भेटीमुळे शाखेच्या कार्यास नवीन प्रेरणा मिळाल्याचे सांगितले. यावेळी उपाध्यक्ष व विद्यार्थी शाखा अध्यक्ष सी.ए. रोशन रुणवाल, सेक्रेटरी सी.ए. सोहन नेहेते, कोषाध्यक्ष सी.ए. लक्ष्मिकान्त लाहोटी, कार्यकारी मंडळ सदस्य सी.ए. नचिकेत जाखेटीया, संयुक्त सदस्य सी.ए. हितेश जैन तसेच जळगाव सी. ए. शाखेचे सर्व माजी अध्यक्ष आणि सभासद मोठ्या संख्येने उपस्थित होते.
