जळगाव, (प्रतिनिधी) : जिल्ह्यात गुन्हेगारीच्या घटनांनी कळस चढवला असून, सलग दुसऱ्या दिवशी गोळीबाराची धक्कादायक घटना समोर आली आहे. एरंडोल तालुक्यातील कढोली गावात आज दि.३ नोव्हेंबर ला दुपारी ४ च्या सुमारास एका ३१ वर्षीय तरुणावर गोळीबार करण्यात आला. या हल्ल्यात तो तरुण गंभीर जखमी झाला असून, त्याला तातडीने उपचारांसाठी जळगाव येथील एका खासगी रुग्णालयात दाखल करण्यात आले आहे.
प्राथमिक माहितीनुसार, जखमी तरुण एका खासगी कंपनीत कार्यरत आहे. उद्या दि.४ रोजी पारोळा येथे होणाऱ्या रथोत्सवासाठी तो आपल्या आई-वडिलांसोबत जाणार होता. आज दुपारी ४ वाजण्याच्या सुमारास तो कढोली गावात घराच्या मागील बाजूस उभा असताना, अचानक गोळी येऊन ती त्याच्या हाताच्या खांद्याखाली छातीजवळ घुसली.
या हल्ल्यामुळे तरुणाला मोठा रक्तस्राव झाला, ज्यामुळे त्याला त्वरित उपचारांसाठी जळगाव येथे हलवावे लागले.सूत्रांनी दिलेल्या माहितीनुसार, गोळीबार करणारे आरोपी जखमी तरुणाच्या परिचयाचे असण्याची शक्यता आहे. या घटनेमुळे गावात आणि परिसरात तणावाचे वातावरण निर्माण झाले आहे.
या घटनेबाबत पोलिसांकडून अद्याप कोणतीही अधिकृत माहिती देण्यात आलेली नाही. एरंडोल पोलीस घटनास्थळ (कढोली गाव) आणि गोळीबारामागील नेमके कारण काय होते, याचा कसून तपास करत आहेत
