जळगाव, (प्रतिनिधी) : शहरातील चंदूअण्णा नगर परिसरात एक धक्कादायक घटना उघडकीस आली आहे. मोबाईलवरील गाणे बंद केल्याच्या रागातून एका पित्याने स्वतःच्या अकरावीत शिकणाऱ्या मुलीला कुकरच्या झाकणाने मारहाण केली, तर पत्नीला काचेचा ग्लास फोडून जखमी केले. ही घटना शुक्रवारी, १५ ऑगस्ट रोजी सकाळी ९ वाजता घडली असून, या प्रकरणी आरोपी समाधान विजयसिंग पाटील (वय ३२, रा. चंदू अण्णा नगर) याच्याविरुद्ध तालुका पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, समाधान पाटील हा दारू पिऊन घरी आला आणि त्याने पत्नीच्या मोबाईलवर गाणी लावली. त्यावेळी त्याची मुलगी प्राप्ती पाटील अभ्यास करत होती. तिने वडिलांना गाणे बंद करण्याची विनंती केली, पण ते ऐकत नसल्याने तिने स्वतःच मोबाईलवरील गाणे बंद केले. याच क्षुल्लक कारणावरून संतप्त झालेल्या समाधानने पत्नी जागृती पाटील हिला काचेचा ग्लास फोडून मारहाण करण्यास सुरुवात केली.
आईला मारहाण होत असताना मुलगी प्राप्ती तिला वाचवण्यासाठी मध्ये आली. तेव्हा पित्याने कुकरच्या झाकणाने तिच्या हातावर मारून तिला जखमी केले. या घटनेनंतर आरोपी समाधान पाटील हा आपल्या मूळ गावी कल्याणेहोळ येथे पळून गेला आहे. तिथे त्याने आपल्या आई-वडिलांकडे “या दोघींचा खून करणार” असे सांगितल्याची माहिती समोर आली आहे. पत्नी जागृती पाटील यांनी तालुका पोलीस ठाण्यात तक्रार दाखल केली असून, पोलिसांनी समाधान पाटील याच्याविरुद्ध गुन्हा दाखल केला आहे. या प्रकरणाचा पुढील तपास सुरू आहे.
