जळगाव, (प्रतिनिधी) : बुलडाणा जिल्ह्यातील मेहकर तालुक्यातील एका तरुणाने सुरत येथील ३५ वर्षीय तरुणीवर लग्नाचे आमिष दाखवून बलात्कार केल्याची धक्कादायक घटना जळगाव शहरातील रेल्वे स्टेशन परिसरातील एका हॉटेलमध्ये उघडकीस आली आहे. याप्रकरणी जळगाव शहर पोलीस स्टेशनमध्ये गुन्हा दाखल करण्यात आला असून, आरोपीला अटक करणे बाकी आहे.
सुरत येथे नोकरी करून उदरनिर्वाह करणाऱ्या पीडित तरुणीला बुलढाणा जिल्ह्यातील मेहकर तालुक्यात राहणारा संशयित आरोपी विनोद शिवराम कुसळकर (वय ३५) याने दि.१८ मे रोजी दुपारी साडेचार ते साडेपाच वाजेदरम्यान जळगावात रेल्वे स्टेशनजवळील एका हॉटेलमध्ये नेले. तेथे त्याने लग्नाचे आमिष दाखवून तिच्याशी बळजबरीने शारीरिक संबंध प्रस्थापित केले.
या घटनेनंतर पीडित तरुणीने दि. १ जून रोजी रात्री ११. ४२ वाजता जळगाव शहर पोलीस स्टेशनमध्ये फिर्याद दिली. त्यानुसार, पोलिसांनी गुन्हा दाखल केला असून, आरोपी विनोद कुसळकर याला अद्याप अटक करण्यात आलेली नाही. पोलीस या प्रकरणाचा पुढील तपास करत आहेत.
