जळगाव, (प्रतिनिधी) : शहरातील पिंप्राळा भागात कुटुंब परदेशात गेल्याची संधी साधत चोरट्यांनी एका बंद घराला लक्ष्य केले आहे. दागदागिन्यांसह सुमारे सव्वा लाखांचा ऐवज चोरून नेल्याची घटना उघडकीस आली आहे. घरातील सीसीटीव्ही कॅमेरे बंद पडल्याने ही घटना घरमालकाला उघड झाली. याबाबत रामानंद नगर पोलीस स्टेशनमध्ये गुन्हा दाखल करण्यात आला आहे.
नरेंद्र दौलतराव वाघे (रा. मारोती पार्क, पिंप्राळा शिवार, जळगाव) हे त्यांच्या पत्नीसह ऑस्ट्रेलिया येथे मुलीकडे गेले आहेत. त्यांनी घरात सीसीटीव्ही कॅमेरे लावले होते. दरम्यान, रविवार, १ जून रोजी सकाळी ९ वाजता नरेंद्र वाघे यांनी त्यांचे पाहुणे लीलाधर शांताराम खंबायत (वय ५१, रा. पार्वती काळे नगर, जळगाव) यांना फोन करून सांगितले की, घराचे सीसीटीव्ही कॅमेरे बंद आहेत, तुम्ही घरी जाऊन पहा. त्यानुसार, लीलाधर खंबायत यांनी घरी जाऊन पाहिले असता वाघे यांच्या घराचा कडीकोंडा तुटलेला दिसला. सीसीटीव्ही कॅमेरांचा डीव्हीआर काढून नेल्याने चोरटे दिसले नाहीत.
घरात तपासले असता सामान अस्ताव्यस्त पडलेला दिसला. त्यानुसार लीलाधर खंबायत यांनी साडू नरेंद्र वाघे यांना घरफोडी झाल्याची माहिती दिली. घरातील सोन्याची चैन व अंगठ्या असा सव्वा लाखांचा मुद्देमाल चोरीस गेलेला दिसून आला आहे. त्यानुसार लीलाधर खंबायत यांनी दिलेल्या फिर्यादीनुसार रामानंद नगर पोलीस स्टेशनला गुन्हा दाखल करण्यात आला आहे. या प्रकरणाचा तपास सहायक पोलीस निरीक्षक संदीप वाघ हे करत आहेत.
