जळगाव : महापौर स्वच्छता संकल्प अभियानांतर्गत महापौर दीपमाला काळे यांनी बुधवारी (दि. ४ नोव्हेंबर) प्रभाग क्रमांक १९ मधील विविध भागांची पाहणी केली. या दौऱ्यादरम्यान त्यांनी जय भवानी नगर परिसराला भेट देऊन स्थानिक नागरिकांशी थेट संवाद साधला आणि त्यांच्या अडीअडचणी जाणून घेतल्या.
गटारी सफाई तातडीने करा
परिसरात गटारी नियमित साफ होत नसल्याची तक्रार नागरिकांनी महापौरांकडे केली. यावर गांभीर्य दाखवत महापौर काळे यांनी संबंधित विभागाला या समस्या तातडीने सोडवण्याचे कडक निर्देश दिले.मेहरूण स्मशानभूमी आणि छत्रपती शिवाजी उद्यान परिसरातील रस्त्यांचे रखडलेले काम लवकरच मार्गी लागेल, अशी ग्वाही त्यांनी यावेळी दिली. तसेच, स्मशानभूमीजवळील नाल्यावर सुरक्षेच्या दृष्टीने तातडीने कठडे (बॅरिकेट्स/रेलिंग) बसवण्याबाबत बांधकाम विभागाला सूचना देण्यात आल्या.
काही भागांत नागरिकांचे बांधकाम साहित्य थेट रस्त्यावर आल्यामुळे वाहतुकीस अडथळा निर्माण होत असल्याचे निदर्शनास आले. हे साहित्य तातडीने उचलून रस्ते मोकळे करण्याचे आदेश त्यांनी दिले.
नागरिकांच्या मागणीनुसार प्रभागात तातडीने जंतूनाशक फवारणी करण्याचे निर्देश आरोग्य विभागाला देण्यात आले. तसेच, पाणीपुरवठा विभागाला नळांना तोटी (टॅप) बसवण्याबाबत योग्य ती कारवाई करण्यास सांगण्यात आले.
या पाहणी दौऱ्यात स्थानिक नगरसेवक राजेंद्र घुगे पाटील, रेखा पाटील, आरोग्य विभागाचे प्रमुख समीर बोरोले, अभियंता विजय मराठे यांच्यासह पाणीपुरवठा, विद्युत व इतर संबंधित विभागांचे अधिकारी आणि कर्मचारी मोठ्या संख्येने उपस्थित होते.
