बोदवड, (प्रतिनिधी) : तालुक्यातील शेलवड येथील ऑनलाइन बैंकिंग व्यवसाय करणाऱ्या तरुणाचा खिसा बोदवड बस स्थानकावर कापला गेला. बसमध्ये चढत असताना अज्ञात चोरट्याने ५० हजार लांबवले. याबाबत तो बोदवड पोलिसात गुन्हा नोंदवण्यासाठी गेला असताना तक्रार न घेतल्याने थेट न्यायालयामार्फत गुन्हा नोंदवला गेला आहे.
हरीश सुरेश डापसे (वय २९) या तरुणाचे शेलवड येथे ऑनलाइन सेवा केंद्र आहे. त्याने २१ रोजी दुपारी बोदवड येथील बँकेतून साठ हजारांची रक्कम काढून शेलवड गावी बसने जाण्यासाठी बोदवड बस स्थानकात उभा असताना दुपारी ३ वाजता बसमध्ये (एम. एच. ४० एन. ९०३९) चढत असताना त्यांच्या खिशात असलेले ५० हजार रुपयांचे बंडल अज्ञात चोरट्याने काढून घेतले.
हा प्रकार बसमध्ये चढल्यानंतर त्याच्या लक्षात आल्याने बाबत बोदवड पोलिस ठाण्यात गेला असता, तक्रार घेण्यास टाळाटाळ करण्यात आली. त्यानंतर २२ रोजी हा तरुण परत पोलिस ठाण्यात गेला असता तक्रार न घेतल्याने या तरुणाने न्यायालयामार्फत कलम १५४ अंतर्गत तक्रार दिली आहे. त्यानुसार गुन्हा दाखल करण्यात आला आहे.
