जळगाव, (प्रतिनिधी) : शहरातील विमानतळाच्या समोर बोहरा इंडस्ट्रीजजवळ बॅनर लावत असताना अचानक विजेचा धक्का लागल्याने खाली पडून मजुराचा मृत्यू झाल्याची धक्कादायक घटना बुधवार दि. १२ मार्च रोजी सकाळी ११ वाजेच्या सुमारास घडली आहे. याप्रकरणी एमआयडीसी पोलीस स्टेशनला अकस्मात मृत्यूची नोंद करण्याचे काम सुरू होते.
अनिल पापा गवळी (वय ५३, रा.कांचन नगर, जळगाव) असे मयत इसमाचे नाव आहे. ते पत्नी, दोन मुले यांचेसह राहत होते. हातमजुरी करून ते परिवाराचा उदरनिर्वाह करीत होते. बुधवारी दि. १२ मार्च रोजी सकाळी ते बॅनर लावण्यासाठी विमानतळाच्या समोर गेले होते. लोखंडी सापळ्यावर बॅनर लावत असताना अचानक त्यांना विजेचा धक्का लागल्यामुळे ते खाली पडले.
आजूबाजूच्या नागरिकांनी त्यांना शासकीय वैद्यकीय महाविद्यालय व रुग्णालयात दाखल केले असता त्या ठिकाणी वैद्यकीय अधिकाऱ्यांनी तपासून त्यांना मयत घोषित केले. यावेळी कुटुंबीयांनी एकच आक्रोश केला. दरम्यान एमआयडीसी पोलीस स्टेशनला अकस्मात मृत्यूची नोंद घेण्याचे काम सुरू होते.
