जळगाव, दि. 03 – सगळी कडे दिवाळी सणाच्या मुहूर्तावर लगबग पाहता निराधार व असाह्य कुटूंबास सणासुदीला मदतीचा हात म्हणून छावा मराठा युवा महासंघाचे जिल्हाध्यक्ष अमोल कोल्हे यांच्यातर्फे स्वर्गीय शंकर निकम यांच्या कुटुंबातील महिलांना साड्या, चिमुकली कनक हिस ड्रेस व दिवाळीच्या फराळाच्या वस्तूचे किट भेट देण्यात आले.
शासकीय वैद्यकीय महाविद्यालय येथे सुमारे दोन महिन्यांपूर्वी उपचारादरम्यान शंकर निकम यांचा मृत्यू झाला होता, सदर दुर्दैवी घटना विसरणे कुटुंबियांना कधीही शक्य होणार नाही. पण क्रूर नियतीवर मात करणे म्हणजेच जिवन होय. दरम्यान कुटुंबाला विविध शासकीय योजनेअंतर्गत लाभ मिळवून देण्यासाठी सर्वतोपरी मदतही केली जाईल असे यावेळी सांगण्यात आले.
त्याच बरोबर राष्ट्रवादी युवती काँग्रेसच्या जिल्हा उपाध्यक्ष दिप्ती भामरे यांनी सुद्धा अत्यावश्यक किराणा सामान भेट दिला. यावेळी राष्ट्रवादी युवती काँग्रेसच्या उत्तर महाराष्ट्र अध्यक्ष दिव्या भोसले उपस्थित होत्या. चिमुकली कनकच्या चेहऱ्यावर हसू उमलले. मित्रांनो आपल्या सभोवताली असणाऱ्या गरजू लोकांना आपण देखील यथाशक्ती मदत करावी, अशी विनंती ही छावा मराठा युवा महासंघाचे जिल्हा अध्यक्ष अमोल कोल्हे यांनी यावेळी केली.
