जळगाव, (प्रतिनिधी) : एरंडोल तालुक्यातील रवंजा येथील एका तरुणाने गिरणा पाटचारीत उडी घेऊन आत्महत्या केल्याची धक्कादायक घटना मंगळवारी दि. २१ जानेवारी रोजी सकाळी उघडकीस आली आहे. याप्रकरणी एरंडोल पोलीस स्टेशनला अकस्मात मृत्यूची नोंद करण्यात आली असून याघटनेमुळे गावात एकच खळबळ उडाली.
सुनील हिरालाल जगताप (वय ३३, रा. रवंजा ता. एरंडोल) असे मयत तरुणाचे नाव आहे. तो गावात परिवारासह राहत होता. दरम्यान एरंडोल पोलीस स्टेशनला अनिल हिरालाल मराठे (रा. रवंजा) यांनी खबर दिली आहे. त्यानुसार सोमवार दि. २० जानेवारी रोजी सकाळी ६ वाजता एका कंपनीत अनिल मराठे हे कामाला गेले होते. तेव्हा त्यांना त्यांच्या मित्राने, तुझा लहान भाऊ सुनील जगताप यांनी गिरणा पाटचारी मध्ये उडी घेतली आहे. तू घरी ये, असा फोन केला.
सकाळी ७ वाजता एरंडोल तालुक्यातील खर्ची शेत शिवारातील अनिल नारायण महाजन यांच्या शेताजवळील गिरणा कॅनॉलमध्ये सुनील जगताप हा आढळून आला. त्याला खाजगी वाहनाने एरंडोल ग्रामीण रुग्णालयात नेले असता तेथे डॉक्टरांनी सुनील जगताप यांना मयत घोषित केले आहे. (केपी)यानंतर कुटुंबीयांनी एकाच आक्रोश केला. दरम्यान सुनील जगताप यांच्याकडे सुसाईड नोट सापडली आहे.
त्याच्यामध्ये म्हटले आहे की, मी सुनील आजपासून सर्व त्याग करीत आहे. आज माझा शेवटचा दिवस आहे. आम्ही दोघेजण व्यवस्थित जीवन जगत होतो. पण आमच्या दोघांमध्ये डिगंबर थोरात याने माझ्या बायकोवर नजर ठेवत होता आणि तिला धमकी देत होता. तू जर माझ्या सांगण्याप्रमाणे केले नाही तर मी तुला बदनाम करेल. हे तिने मला सर्व काही सांगितले व मी ते ऐकून स्तब्ध झालो. माझे होश उडाले. आता मी काहीच करू शकत नाही. त्यामुळे मी माझी जीवनयात्रा संपवतो असे सुसाईड नोट मध्ये म्हटले आहे. घटनेमुळे रवंजा गावामध्ये शोककळा पसरली असून एरंडोल पोलीस स्टेशनला अकस्मात मृत्यूची नोंद करण्यात आले आहे. पुढील तपास पो.नि. निलेश गायकवाड यांच्या मार्गदर्शनाखाली सहाय्यक फौजदार राजेश पाटील करीत आहेत.
