जळगाव | दि. ०९ ऑगस्ट २०२४ | अहमदनगर वरून बिहार येथे दरभंगा एक्सप्रेसने घरी जात असताना पाचोरा तालुक्यातील माहिजी जवळ रेल्वेतून पडल्याने एका परप्रांतीय तरूणाचा गंभीर मार लागून मृत्यू झालायं. पोलिसांनी त्याची ओळख पटवली असून याप्रकरणी रेल्वे पोलीस दुरक्षेत्र येथे अकस्मात मृत्यूची नोंद करण्यात आली आहे.
अरविंद कुमार प्रेमनाथ सरदार (वय १९, रा. सुखानगर, ता. प्रतापगंज जि. सुपल, बिहार) असे मयत अरुणाचे नाव आहे. आई-वडील, एक भाऊ, चार बहिणी असा परिवार आहे. अरविंद कुमार हा अहमदनगर जिल्ह्यातील घोडेगाव येथील एका ऑइल मिल कंपनीत कामाला आहे. त्याच्यासोबत चार कामगार हे सुट्टी घेऊन नगरवरून बिहार येथे गुरुवार दि. ८ ऑगस्ट रोजी सकाळी दरभंगा एक्सप्रेसने निघाले होते.
दरम्यान दरभंगा एक्सप्रेस जळगाव जिल्ह्यात आली असता माहिजी रेल्वे स्टेशनच्या परिसरात खंबा क्रमांक ३८६/१० ते १२ दरम्यान तो अचानक रेल्वेतून खाली पडला. हे मात्र सोबतच्या कामगारांना लक्षात आले नाही. रेल्वेमध्ये गर्दी खूप असल्यामुळे ते भुसावळला उतरले. तेव्हा अरविंद कुमार दिसून आला नाही. माहिजी रेल्वे स्टेशनजवळ स्टेशन मास्तरने रेल्वे पोलिसांना कळवल्यानंतर पोलिसांनी अरविंद कुमारचा मृतदेह शासकीय वैद्यकीय महाविद्यालय व रुग्णालयात दाखल केला होता. त्यानंतर त्याची ओळख पटवण्याचे काम सुरू केले होते.
अरविंद कुमार याच्याजवळ आढळून आलेल्या दोन मोबाईलमुळे त्याची ओळख पटवली. त्यानुसार अरविंद कुमार यांचे जिजाजी सुनील विद्यानंद सरदार यांनी त्यास ओळखले. सदर घटनेबाबत रेल्वे दूरक्षेत्र पोलीस स्टेशनला अकस्मात मृत्यूची नोंद करण्यात आली आहे.
