जळगाव (प्रतिनिधी) : शहरातील शिव कॉलनीतील हॉटेल स्वाद येथे जेवणासाठी गेलेल्या तरूण पोलिसाला तीन जणांनी दारूच्या नशेत येवून शिवीगाळ व मारहाण करत जवळील खूर्ची मारून डोळ्याला दुखापत केल्याची घटना मंगळवारी रात्री सव्वा ११ वाजेच्या सुमारास घडली आहे. याप्रकरणी बुधवारी रामानंद नगर पोलीस ठाण्यात ३ जणांविरोधात गुन्हा दाखल करण्यात आला आहे.
पोलीस कर्मचारी नितेश जयराम बच्छाव (वय ३३ रा. वाघ नगर, जळगाव) हे रामानंदनगर पोलीस ठाण्यात हजेरी मास्टर असून त्याचे मित्र शरद साळवे व दिपक असे तिघेजण शिवकॉलनीतील हॉटेल स्वाद येथे जेवणासाठी बसलेले होते. त्यावेळी त्यांच्या बाजूला संशयित आरोपी नितीन गंगाधरराव देशमुख (वय ५०, रा. जिल्हापेठ, लिलाधर सदाशिव तायडे (वय ७१ रा. शिवकॉलनी) आणि विनोद राजू चव्हाण (वय ३५ रा. धरणगाव) हे तिघे दारू पिण्यासाठी बसलेले असतांना मोठमोठ्याने आरडाओरड करत होते.
त्यावेळी नितेश बच्छाव यांनी तिघांना हळू आवाजात बोलण्याचे सांगितले. या रागातून तिघांनी नितेश यांना चापटाबुक्क्यांनी बेदम मारहाण करून जवळील खुर्ची मारून डोळ्याला दुखापत केली. याप्रकरणी रामानंद नगर पोलीस ठाण्यात तक्रार देण्यात आली. त्यानुसार मारहाण करणारे नितीन गंगाधरराव देशमुख, लिलाधर तायडे आणि विनोद राजू चव्हाण यांच्यावर गुन्हा दाखल करण्यात आला आहे. पुढील तपास पोहेकॉ प्रशांत पाटील हे करीत आहे.
