जळगाव, दि.०१ – क्रीडा युवक सेवा संचालनालय महाराष्ट्र राज्य पुणेमार्फत राज्यस्तरीय युवक महोत्सवाचे आयोजन दिनांक २८ ते ३१ डिसेंबरदरम्यान उदगीर, जि. लातूर या ठिकाणी करण्यात आले होते. महाराष्ट्रातील आठ महसूल विभागातून कान्ह ललित कला केंद्र, जळगावची वैभव मावळे लिखित एकांकिका कंदीलने आठ विभागातून प्रथम पारितोषिक पटकावून तिची राष्ट्रीय स्तरावर निवड करण्यात आली आहे.
कान्ह ललित कला केंद्र, विभाग नाशिक आता २७ व्या राष्ट्रीय युवा महोत्सवात प्रतिनिधित्व करणार के.सी. ई. सोसायटीचे अध्यक्ष प्रज्ञावंत नंदकुमार बेंडाळे, सांस्कृतिक समन्वयक व प्रशासकीय अधिकारी शशिकांत वडोदकर व प्रा. डॉ एस.एन भारंबे यांनी विद्यार्थ्यांना शुभेच्छा दिल्या आहेत. कान्ह ललित कला केंद्राचे संचालक प्रा. प्रसाद देसाई यांच्या नेतृत्वात संघाने यश मिळवलेले आहे.
१२ जानेवारी रोजी स्वामी विवेकानंद यांच्या जयंतीचे म्हणजेच युवादिनाचे औचित्य साधत साजरा होणार्या २७ व्यां राष्ट्रीय युवा महोत्सवाचे उद्घाटन पंतप्रधान नरेंद्र मोदी यांच्या हस्ते होणार आहे. यावेळी २७ राज्यातील युवकांची मांदियाळी उपस्थित राहणार आहे. क्रीडा व युवक सेवा संचालनालय पुणेमार्फत सांस्कृतिक महोत्सवाचे आयोजन करण्यात येते. जिल्हा विभाग आणि राज्यस्तरावर केंद्र शासनाने राज्याला दिलेल्या संकल्पना आधारित विविध कार्यक्रमांचे आयोजन करण्याचे निर्देश करण्यात आलेले आहेत.
या स्पर्धांच्या माध्यमातून प्राथमिक, विभागीय राज्यस्तरीय आणि राष्ट्रीय स्तरावर युवांना आपल्या कला दाखवण्याचा आणि त्यात पारंगत होण्याचा बहुमान मिळत असतो. त्याचप्रमाणे त्यांना शासनातर्फे प्रमाणपत्रासह रोख रकमेचे ही बक्षीस मिळत असल्याने यामुळे युवांचा उत्साह द्विगुणीत होत असतो. यात आता कान्ह ललित कला केंद्राने एकांकिका या कला प्रकारात पहिले बक्षीस मिळवून् बाजी मारली असून पुढील १२ जानेवारी रोजी होणाऱ्या राष्ट्रीय स्तरावर जाण्यासाठी चमू सज्ज झाला आहे . विद्यार्थ्यांना प्रा. पियुष बडगुजर, दिनेश माळी, प्रा. अजय शिंदे, प्रा. देवेंद्र गुरव, प्रा. वैभव मावळे, प्रसाद कासार आणि प्रा. हेमंत पाटील यांनी मार्गदर्शन केले आहे. विद्यार्थ्यांना पुढील वाटचालीसाठी उपसंचालक नाशिक क्रीडा विभाग तथा जिल्हा क्रीडा अधिकारी जळगाव रवींद्र नाईक यांनी शुभेच्छा दिल्या.