जळगाव, दि.०८ – महानगरपालिकेतील स्वीकृत माजी नगरसेवक महेश रतन चौधरी यांचे वयाच्या ५० व्या वर्षी हृदयविकाराने शुक्रवारी ८ डिसेंबरला सायंकाळी साडेसात वाजेच्या सुमारास खासगी रुग्णालयात उपचार घेताना निधन झाले. भारतीय जनता पार्टी कडून जळगाव महानगरपालिकेत त्यांना पहिल्यांदाच स्वीकृत नगरसेवक म्हणून संधी मिळाली होती.
महेश चौधरी हे भाजपाचे पदाधिकारी व कार्यकर्ते होते. दरम्यान, गेल्या तीन दिवसांपूर्वी त्यांना हृदयविकाराचा झटका आला होता. दरम्यान त्यांच्यावर शहरातील एका खाजगी रुग्णालयात उपचार सुरु होते. उपचार सुरु असताना शुक्रवारी संध्याकाळी साडे सात वाजता त्यांची प्राणज्योत मालवली.
त्यांच्या निधनाची वार्ता कळताच कुटुंबीय, नातेवाईक, मित्रपरिवार तसेच राजकीय, सामाजिक व विविध क्षेत्रातील नागरिकांनी रुग्णालयाकडे धाव घेतली. महेश चौधरी हे तेली समाज शिक्षण प्रसारक मंडळाचे अध्यक्ष होते. तर त्यांचे वडील आर. टी. चौधरी हे देखील माजी नगरसेवक होते. तसेच, त्यांच्या पश्चात पत्नी, १ मुलगा, १ मुलगी असा परिवार आहे.
