जळगाव, दि.२९ – आमदार सुरेश भोळे (राजूमामा) यांच्या पाठपुराव्याने जळगाव शहराच्या विकासासाठी पावसाळी अधिवेशनात १५ कोटी रूपयांच्या निधीला राज्य शासनाने मंजुरी दिली असून यातून रस्त्यांसह इतर कामे मार्गी लागणार आहेत.
आ. सुरेश भोळे यांचा शहराच्या विकासासाठी निधी मिळवण्यासाठी सातत्याने प्रयत्न सुरू होता दरम्यान पावसाळी अधिवेशनात आमदार भोळे यांच्या प्रयत्नांना यश मिळाले असून आता शहराच्या विकासासाठी अजून १५ कोटी रूपयांचा निदी मिळाला आहे. यात आधीच छत्रपती शिवाजी महाराज चौकापासून ते चित्रा चौक दरम्यानच्या रस्त्यासाठी पाच कोटींचा निधी मंजूर करण्यात आला होता. यानंतर शुक्रवारी पुन्हा १० कोटींचा निधी मंजूर झाला आहे.
या १० कोटी रूपयांमधून रस्ते आणि गटारींसाठी ७ कोटींची तरतूद करण्यात आली असून स्मशानभूमीतील विविध कामांसाठी ७५ लक्ष रूपये मंजूर करण्यात आले आहेत. तर शहराच्या विस्तारीत भागातील पथदिव्यांसाठी ७५ लाखांची तरतूद करण्यात आली आहे. उर्वरित दीड कोटी रूपयांमध्ये शहरात आबालवृध्दांसाठी बगिच्याची निर्मिती करण्यात येणार आहे. अर्थात, या १५ कोटींच्या निधीपैकी १२ कोटींचा निधी रस्त्यांसाठी तर उर्वरीत कामांना तीन कोटी रूपयांची तजवीज करण्यात आली आहे.
▪️शहरातील विकासकामांसाठी माझा पाठपुरावा सुरू असून यातून भरीव कामे मार्गी लागत आहेत. उर्वरित कामांसाठी माझे सातत्याने प्रयत्न सुरू असून यातून लवकरच शहरातील इतर कामांचा देखील मार्ग मोकळा होईल.
सुरेश भोळे (राजुमामा)
आमदार, जळगाव शहर मतदार संघ
