लालसिंग पाटील | भडगाव, दि. ०१ – तालुक्यातील कजगाव येथील सेंट्रल बँकेच्या शाखेत कर्मचारी संख्या वाढण्याच्या मागणीसाठी कजगाव ग्रामस्थांनी शाखा अधिकारी सुरेश कुमार यांना बुधवारी निवेदन दिले. दरम्यान गेल्या काही दिवसांपासून सेंट्रल बँकेच्या कजगाव शाखेत पुरेशे कर्मचारी नसल्याने ग्राहकांना सेवा देण्यासाठी बँकेला ही मोठी कसरत करावी लागत आहे. पैसे काढणे पुस्तकाची एन्ट्री करण्यास विविध अडचणी येत आहेत.
त्यामुळे जेष्ठ नागरिकांसह अनेकांना अडचणी येतात बॅंकेत कर्मचारी संख्या वाढवण्यात यावी अशी मागणी शाखा अधिकारी यांच्याकडे करण्यात आली. तसेच ही बाब बँकेच्या वरिष्ठांच्या निदर्शनास आणून द्यावी, अशी अपेक्षा ग्रामस्थांनी व्यक्त केली. तरी दिनांक १० जून पर्यंत बँकेत कर्मचारी संख्या न वाढल्यास आम्ही बँकेसमोर ठिय्या आंदोलन करू असा इशारा देण्यात आला.
यावेळी माजी ग्राम पंचायत सदस्य अनिल महाजन, माजी सरपंच मनोज धाडीवाल, ग्रामपंचायत सदस्य अनिल टेलर, आशिष वाणी, यशवंत मोरे, दिनेश पाटील, इसाक बागवान, कैलास पवार, दानिश खाटिक, सचिन मिस्तरी, सागर कुमावत, भूषण शेंडे, निवृत्ती पवार आदींसह मोठ्या संख्येत ग्रामस्थ उपस्थित होते. दरम्यान सदरील निवेदनाची प्रत जळगाव लोकसभेचे खासदार उन्मेष पाटील, भडगाव-पाचोरा विधानसभेचे आमदार किशोर पाटील व जळगाव येथील सेंट्रल बँकेच्या वरीष्ठ अधिकाऱ्यांना पाठवली आहे.
