जळगाव, प्रतिनिधी : दिवाळी पाडव्याच्या मंगलमय पहाटे अभंगवाणी, नाट्यगीते आणि सुगम संगीताची सुरेल मैफल अनुभवण्याची संधी जळगावकरांना मिळणार आहे. आकाशवाणी जळगावच्या ५० व्या वर्षपूर्तीनिमित्त आणि स्व. वसंतराव चांदोरकर स्मृती प्रतिष्ठानच्या रौप्यमहोत्सवी वर्षानिमित्त मंगळवार, १० नोव्हेंबर २०२६ रोजी महात्मा गांधी उद्यानात ‘पाडवा पहाट’ या प्रातःकालीन संगीत मैफिलीचे आयोजन करण्यात आले आहे. कार्यक्रमाची सुरुवात सकाळी ठीक ६ वाजता होणार आहे.
आकाशवाणी जळगाव, स्व. वसंतराव चांदोरकर स्मृती प्रतिष्ठान आणि कै. नथ्थूशेट चांदसरकर ट्रस्ट यांच्या संयुक्त विद्यमाने हा कार्यक्रम आयोजित करण्यात आला आहे. नाशिक येथील आणि आकाशवाणी जळगावचे मान्यताप्राप्त कलाकार या मैफिलीत सादरीकरण करणार आहेत.
या मैफिलीत आशिष रानडे, ईश्वरी दसक्कर कदडी आणि पूजा दसक्कर यांचे गायन होणार आहे. त्यांना तबल्यावर सुजित काळे, संवादिनीवर सुभाष दसक्कर, सिंथेसायझरवर विजय नेवे आणि ऑक्टोपॅडवर नितेश पाटील साथसंगत करणार आहेत. उद्घाटन सत्राचे सूत्रसंचालन दीपिका घैसास करणार आहेत.
कार्यक्रमाला खासदार स्मिताताई वाघ, आमदार राजूमामा भोळे, महापौर दीपमाला काळे, जिल्हाधिकारी रोहन घुगे, पोलीस अधीक्षक श्रीकांत धिवरे, आकाशवाणी जळगावचे कार्यक्रम प्रमुख ज्ञानेश्वर बोबडे, उद्योगपती अशोक जैन आणि कै. नथ्थूशेट चांदसरकर ट्रस्टचे मेजर नानासाहेब वाणी उपस्थित राहणार आहेत.
या कार्यक्रमाला भवरलाल अँड कांताबाई फाऊंडेशनचे सहकार्य लाभले आहे. ही मैफल आकाशवाणी जळगाववरून प्रसारित होणार असल्याने कार्यक्रम सकाळी ठीक ६ वाजता सुरू होईल. रसिकांनी कार्यक्रम सुरू होण्याच्या किमान १० मिनिटे आधी आसनस्थ व्हावे आणि या सुरेल मैफिलीचा आनंद घ्यावा, असे आवाहन आकाशवाणी जळगाव, स्व. वसंतराव चांदोरकर स्मृती प्रतिष्ठान आणि चांदसरकर ट्रस्टच्या वतीने करण्यात आले आहे.
