जळगाव, प्रतिनिधी : जळगाव महापालिकेतर्फे मालमत्ता कर वसुलीसाठी पिंप्राळा परिसरातील निमखेडी शाळेत विशेष शिबिराचे आयोजन करण्यात आले होते. या शिबिरात अवघ्या चार तासांत २ लाख ८ हजार रुपयांचा मालमत्ता कर जमा झाला. दरम्यान, मालमत्ता कर भरणाऱ्या नागरिकांना डिसेंबर २०२६ पर्यंत ३ टक्के सूट मिळणार असून, जानेवारी २०२७ पासून थकीत करावर दरमहा २ टक्के दंड आकारण्यास सुरुवात होणार आहे.
महापालिकेच्या महसुलात वाढ व्हावी आणि नागरिकांना मालमत्ता कर भरणे सुलभ व्हावे, यासाठी विविध उपाययोजना राबवण्यात येत आहेत. त्याचाच एक भाग म्हणून पिंप्राळा परिसरात या विशेष शिबिराचे आयोजन करण्यात आले होते. सकाळी १० ते दुपारी २ या वेळेत झालेल्या शिबिरात परिसरातील ३० मिळकतधारकांनी सहभाग घेत कराचा भरणा केला.
डिसेंबरअखेरपर्यंत मिळणाऱ्या ३ टक्के सवलतीचा लाभ घेऊन नागरिकांनी मालमत्ता कर भरावा. जानेवारीपासून लागू होणारा दंड टाळण्यासाठी कराचा भरणा वेळेत करावा, असे आवाहन महापालिका प्रशासनातर्फे करण्यात आले आहे.
