जामनेर, प्रतिनिधी : साक्षात वानर हनुमान प्रतिष्ठान, जामनेर यांच्या वतीने आयोजित ‘जागर दुर्गाशक्तीचा’ या कार्यक्रमात प्रा. वसंत हंकारे यांनी तरुणाईसमोरील गंभीर सामाजिक प्रश्नांवर परखड भाष्य केले. तरुणांमधील वाढती व्यसनाधीनता, मुलींच्या पलायनाचे वाढते प्रमाण, मोबाईल न मिळाल्याने टोकाचे निर्णय घेण्याच्या घटना तसेच तरुणांमधील वाढती हिंसक प्रवृत्ती आणि खुनांच्या घटनांबाबत समाजाने गांभीर्याने विचार करण्याचे आवाहन त्यांनी केले.
आई-वडिलांच्या त्यागाची जाणीव तरुणाईला व्हावी, या उद्देशाने हंकारे यांनी आई आणि वडिलांचे जीवनातील महत्त्व भावनिक शब्दांत उलगडून सांगितले. वडिलांचे कष्ट, त्याग आणि मुलांच्या भविष्यासाठी त्यांनी घेतलेले अपार परिश्रम यांची जाणीव करून देताना त्यांनी उपस्थितांना अंतर्मुख केले. आईचे प्रेम, तिचा त्याग आणि तिचे आयुष्यातील अनमोल स्थान समजावून सांगताना सभागृहातील अनेकांच्या डोळ्यांत अश्रू तरळले. विद्यार्थ्यांनी आणि तरुणांनी आपल्या कुटुंबाप्रती असलेली कर्तव्ये ओळखून जबाबदारीने वागावे, असा संदेश त्यांनी दिला.
नऊ कर्तृत्ववान महिलांचा ‘नवदुर्गा’ म्हणून सन्मान..
कार्यक्रमात समाजातील विविध क्षेत्रांत संघर्षातून आपले कर्तृत्व सिद्ध करणाऱ्या महिलांचा गौरव करण्यात आला. विविध क्षेत्रांतील या नऊ दुर्गांचा सन्मान करून प्रतिष्ठानने महिलांच्या कष्टांचा, संघर्षाचा आणि कर्तृत्वाचा गौरव केला.
यावेळी ६४ समाजाचे प्रतिनिधी उपस्थित होते. जामनेर नगरपालिकेच्या नगराध्यक्षा साधना महाजन, जामनेर पोलीस स्टेशनचे पोलीस निरीक्षक निवृत्ती बोऱ्हाडे, श्याम चैतन्य महाराज उपस्थित होते. साक्षात वानर हनुमान प्रतिष्ठानचे राहुल चव्हाण यांनी प्रास्ताविकातून कार्यक्रमामागील भूमिका मांडली.
कार्यक्रमाचे सूत्रसंचालन प्रशांत वाघ आणि जगदीश बैरागी यांनी केले. कार्यक्रमाच्या यशस्वीतेसाठी नाना सातवे, ईश्वर पवार, डॉ. विनोद भोई, ईश्वर चवरे, जितेंद्र कुमावत, संतोष सोनवणे, मयूर पवार सर, गणेश चौधरी, शुभम निकम, अनमोल माळी, जयवंत पर्वते, ईश्वर चौधरी, शंकर सातवे, भारत ठाकरे तसेच श्री मॉर्निंग ग्रुपचे सहकार्य लाभले.
जामनेर शहरातील सर्व समाजाने या कार्यक्रमाला गांभीर्याने घेत मोठ्या संख्येने उपस्थित राहण्यासाठी प्रयत्न केले.सामाजिक प्रश्नांवर जागृती, पालकांविषयी कृतज्ञतेची भावना आणि महिलांच्या कर्तृत्वाचा गौरव या त्रिसूत्रीच्या माध्यमातून ‘जागर दुर्गाशक्तीचा’ या उपक्रमाने जामनेरमध्ये सामाजिक प्रबोधनाचा संदेश दिला.
