मुंबई, विशेष प्रतिनिधी : महाराष्ट्र राज्यात जाहीर झालेल्या दुष्काळजन्य परिस्थितीच्या पार्श्वभूमीवर संकटग्रस्त नागरिकांच्या पाठीशी उभे राहण्याची सामाजिक बांधिलकी जपत जळगाव शहर विधानसभा मतदारसंघाचे आमदार सुरेश दामु भोळे (राजूमामा) यांनी मुख्यमंत्री सहायता निधीसाठी २ लाख रुपयांचा धनादेश सुपूर्द केला. दि. ६ ऑक्टोबर २०२६ रोजी मा. मुख्यमंत्री महोदयांकडे हा निधी सोपवण्यात आला.
राज्यात निर्माण झालेल्या दुष्काळी परिस्थितीमुळे शेतकरी, शेतमजूर आणि ग्रामीण भागातील अनेक कुटुंबे गंभीर आर्थिक व सामाजिक अडचणींचा सामना करत आहेत. अशा वेळी शासनाच्या मदत योजनांना बळ देण्यासाठी समाजातील सक्षम घटकांनीही मदतीचा हात पुढे करणे गरजेचे आहे, या उद्देशाने आमदार राजूमामा भोळे यांनी पुढाकार घेतला.
या प्रसंगी बोलताना आमदार राजूमामा भोळे म्हणाले, “दुष्काळ ही केवळ शासनाची जबाबदारी नसून अशा कठीण काळात प्रत्येक सक्षम घटकाने आपली सामाजिक बांधिलकी जपणे गरजेचे आहे. आपल्या क्षमतेनुसार केलेली छोटीशी मदतही एखाद्या गरजू कुटुंबासाठी मोठा आधार ठरू शकते.”
तसेच जळगावसह महाराष्ट्रातील उद्योजक, व्यापारी, दानशूर नागरिक, सामाजिक संस्था व विविध क्षेत्रांतील सक्षम व्यक्तींनी मुख्यमंत्री सहायता निधीमध्ये योगदान द्यावे, असे आवाहन त्यांनी केले. संकटाच्या या काळात शासनाचा हात आणि समाजाची साथ एकत्र आल्यास दुष्काळग्रस्तांना मोठा दिलासा मिळू शकेल, असा विश्वास त्यांनी व्यक्त केला.
