जळगाव, प्रतिनिधी : जळगाव रेल्वे स्थानकावर अचानक प्रकृती खालावल्याने शासकीय वैद्यकीय महाविद्यालय व रुग्णालयात उपचारासाठी दाखल करण्यात आलेली मो. अकिजारा अख्तर मो. अबछार (२५, रा. गारचर युनियन, जि. जमालपूर, बांगलादेश) ही महिला बांगलादेशी नागरिक असल्याचे पोलिस तपासात उघड झाले आहे. भारतात बेकायदेशीरपणे वास्तव्य केल्याप्रकरणी जिल्हापेठ पोलिस ठाण्यात इमिग्रेशन कायदा तसेच परदेशी नागरिक कायद्यातील संबंधित कलमांनुसार गुन्हा दाखल करण्यात आला आहे.
मो. अकिजारा अख्तर या महिलेला १ ऑक्टोबरपासून शासकीय वैद्यकीय महाविद्यालय व रुग्णालयात उपचारासाठी दाखल करण्यात आले होते. उपचारादरम्यान तिचे बोलणे आणि भाषा यावरून पोलिसांना संशय आला. याबाबत पोलिसांनी जिल्हा पोलिस अधीक्षक श्रीकांत धिवरे यांना माहिती दिली. त्यांच्या सूचनेनुसार जिल्हापेठ पोलिस आणि स्थानिक गुन्हे शाखेने अधिक चौकशी सुरू केली.
पोलिसांनी केलेल्या चौकशीत सदर महिला बांगलादेशातील रहिवासी असल्याचे समोर आले. ३ ऑक्टोबर रोजी तिला ताब्यात घेऊन शासकीय आशादीप महिला वसतिगृहात दाखल करण्यात आले. त्यानंतर ४ ऑक्टोबर रोजी तिचा जबाब नोंदविण्यात आला. त्यातून तिच्या भारतातील वास्तव्याबाबतची माहिती पोलिसांच्या हाती आली.
पोलिस तपासानुसार, अकिजारा अख्तर ही घटस्फोटित असून तिचे भाऊ व इतर नातेवाईक बांगलादेशात राहतात. एका मैत्रिणीच्या माध्यमातून तिची भारतात वास्तव्यास असलेल्या एका बांगलादेशी महिलेशी ओळख झाली. ही महिला जयपूर येथे राहत असून अकिजारा तिला ‘मावशी’ म्हणून संबोधत असल्याचे तपासात समोर आले आहे.
या महिलेने अकिजाराला भारतात आणण्यासाठी तिच्या घरापर्यंत रिक्षा पाठवली. त्यानंतर ती रिक्षाने भारत-बांगलादेश सीमेपर्यंत आली आणि तेथून भारतात प्रवेश केल्याचे पोलिस तपासात निष्पन्न झाले. पश्चिम बंगालमार्गे ती जयपूर येथे पोहोचली आणि त्यानंतर सुमारे तीन महिने जयपूरमध्ये वास्तव्यास असल्याची माहिती पोलिसांनी मिळवली आहे.
जयपूरमध्ये राहणाऱ्या या महिलेने फिरण्यासाठी घेऊन जाण्याच्या बहाण्याने अकिजाराला रेल्वेने प्रवासाला नेले. मात्र, जळगाव रेल्वे स्थानकावर तिची प्रकृती अचानक खालावली. त्यामुळे तिला उपचारासाठी रुग्णालयात दाखल करण्यात आले. दरम्यान, तिच्यासोबत असलेली मावशी तेथून पसार झाली. तिचा मोबाईलही सोबत घेऊन गेल्याचे तपासात समोर आले आहे.
या प्रकरणी जिल्हापेठ पोलिस ठाण्यात गुन्हा दाखल करण्यात आला असून पुढील तपास सहाय्यक पोलिस निरीक्षक अनिल वाघ करीत आहेत.
