जळगाव प्रतिनिधी : पती जेवणासाठी बाहेर गेलेला असताना जुने जळगाव परिसरातील राहत्या घरात १८ वर्षीय विवाहितेने गळफास घेऊन आत्महत्या केल्याची घटना २१ सप्टेंबर रोजी घडली. झिलीक टपन मंडल असे मृत विवाहितेचे नाव आहे. या घटनेप्रकरणी शनिपेठ पोलिस ठाण्यात अकस्मात मृत्यूची नोंद करण्यात आली आहे.
मूळचे पश्चिम बंगालमधील रहिवासी असलेले सुवर्ण कारागीर सनाजीत संत्रा हे जुने जळगाव परिसरात भाड्याची खोली घेऊन पत्नी झिलीक मंडल यांच्यासह राहत होते. २१ सप्टेंबर रोजी सनाजीत हे दुकानमालकाकडे जेवणासाठी गेले होते. त्यावेळी झिलीक या घरी एकट्याच होत्या. जेवण झाल्यानंतर सनाजीत घरी परतले असता झिलीक यांनी घरात गळफास घेतल्याचे त्यांच्या निदर्शनास आले.
घटनेची माहिती मिळताच शेजाऱ्यांनी तत्काळ डायल ११२ वर संपर्क साधला. त्यानंतर शनिपेठ पोलिस घटनास्थळी दाखल झाले. पोलिसांनी झिलीक यांना तातडीने शासकीय वैद्यकीय महाविद्यालय व रुग्णालयात दाखल केले. मात्र, वैद्यकीय तपासणीनंतर डॉक्टरांनी त्यांना मृत घोषित केले.
या घटनेची माहिती मिळाल्यानंतर शनिपेठ पोलिसांनी पंचनामा करून अकस्मात मृत्यूची नोंद केली असून, पुढील कार्यवाही सुरू आहे.
