चाळीसगाव/मेहुणबारे (प्रतिनिधी) : जामदा शिवारातील गिरणा नदीकाठच्या काटेरी झुडपांच्या आडोशाने सुरू असलेल्या अवैध गावठी हातभट्टीवर मेहुणबारे पोलिसांनी २२ सप्टेंबर रोजी छापा टाकला. या कारवाईत सागर धर्मा गोकुळ (रा. जामदा) याला ताब्यात घेण्यात आले आहे.
परिभ्रमण पोलीस उपअधीक्षक सह्याद्री बिले यांना मिळालेल्या गुप्त बातमीच्या आधारे पोलिसांनी भट्टीवर धाड टाकली. तेथे १०० लिटरच्या ६ ड्रममध्ये भरलेले सुमारे ६०० लिटर गुळ-नवसागरमिश्रित कच्चे व पक्के रसायन आढळून आले.
सुमारे ३० हजार रुपये मूल्याचा हा मुद्देमाल पोलिसांनी घटनास्थळीच नष्ट केला असून आरोपीविरुद्ध मेहुणबारे पोलिसांत गुन्हा नोंदवण्यात आला आहे.
