पाचोरा, प्रतिनिधी : पोषण आहार योजनेचे धान्य घेऊन पाचोऱ्याकडून जामनेरच्या दिशेने जाणाऱ्या ४०७ मालवाहू टेम्पोचे अचानक मागील चाकाचे टायर फुटल्याने वाहनावरील नियंत्रण सुटले. या अपघातात टेम्पोच्या मागील भागात धान्याच्या गोण्यांवर बसलेले दोन हमाल रस्त्यावर फेकले गेले. गंभीर दुखापत झाल्याने दोघांचाही जागीच मृत्यू झाला. मंगळवारी (१५ सप्टेंबर) सकाळी साडेदहा वाजेच्या सुमारास गोंदेगावजवळील ऋषीबाबा मंदिर परिसरात हा अपघात झाला.
मृतांमध्ये पाचोरा शहरातील कृष्णापुरी भागातील जगदीश लालचंद पाटील (४१) आणि बहिरम नगर येथील अर्जुन तुकाराम पाटील (५२) यांचा समावेश आहे. मिळालेल्या माहितीनुसार, पोषण आहार योजनेचे धान्य घेऊन ४०७ मालवाहू टेम्पो (एमएच १४ एफ ३५०४) मंगळवारी सकाळी पाचोऱ्याहून जामनेरच्या दिशेने रवाना झाला होता. टेम्पोच्या मागील भागात धान्याच्या गोण्यांवर जगदीश पाटील आणि अर्जुन पाटील हे दोन्ही हमाल बसले होते.
गोंदेगावजवळ ऋषीबाबा मंदिराजवळ पोहोचताच वाहनाच्या मागील चाकाचा टायर अचानक फुटला. त्यामुळे चालकाचे वाहनावरील नियंत्रण सुटले. टायर फुटल्याने वाहनाचा वेग आणि तोल बिघडल्याने मागील भागातील दोन्ही हमाल गाडीबाहेर फेकले गेले. त्यांना गंभीर दुखापत झाल्याने त्यांचा घटनास्थळीच मृत्यू झाला.
अपघाताची माहिती मिळताच स्थानिक नागरिकांनी घटनास्थळी धाव घेत मदतकार्य सुरू केले. पहूर पोलीस ठाण्याचे एपीआय प्रवीण दात्रे, पोलीस उपनिरीक्षक नंदकुमार शिंबरे आणि त्यांच्या सहकाऱ्यांनी घटनास्थळी पोहोचून परिस्थितीचा आढावा घेतला.
दोघांचे पहूर ग्रामीण रुग्णालयात शवविच्छेदन करण्यात आले. या प्रकरणी पहूर पोलीस ठाण्यात उशिरापर्यंत गुन्हा दाखल करण्याची प्रक्रिया सुरू होती. पोलीस उपनिरीक्षक नंदकुमार शिंबरे तपास करीत आहेत.
अपघातात दोन कर्त्या व्यक्तींचा मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. पाचोरा, पहूर आणि शेंदुर्णी परिसरात या घटनेमुळे हळहळ व्यक्त होत आहे. दरम्यान, पाचोऱ्यातून नेण्यात येणारे पोषण आहाराचे धान्य नेमके कोणत्या केंद्रासाठी होते, त्याच्या वाहतुकीचे कंत्राट कोणाकडे होते, वाहनाची स्थिती कशी होती आणि वाहतूक करताना आवश्यक सुरक्षा नियमांचे पालन करण्यात आले होते का, याबाबत नागरिकांकडून प्रश्न उपस्थित केले जात आहेत. अपघाताची जबाबदारी निश्चित करून मृत हमालांच्या कुटुंबीयांना संबंधितांकडून आर्थिक मदत मिळावी, अशी मागणीही होत आहे.
