जळगाव, प्रतिनिधी : शहरातील तळेले कॉलनीतील रहिवासी हेमांगी निखिल महाजन (३०) या विवाहितेने आपल्या चार वर्षीय मुलगा शौर्य याच्यासह गळफास घेऊन आत्महत्या केल्याची धक्कादायक घटना सोमवारी (१४ सप्टेंबर) सायंकाळी सहा वाजेच्या सुमारास घडली. या घटनेमुळे तळेले कॉलनी परिसरात हळहळ व्यक्त होत आहे. याप्रकरणी शनिपेठ पोलिस ठाण्यात अकस्मात मृत्यूची नोंद करण्यात आली असून आत्महत्येचे कारण अद्याप स्पष्ट झालेले नाही.
हेमांगी यांचे पती सैन्यदलात कार्यरत असून सध्या राजस्थान येथे कर्तव्यावर आहेत. हेमांगी या तळेले कॉलनीतील सासरच्या मंडळींसोबत राहत होत्या.
सोमवारी गणेश चतुर्थीनिमित्त तळेले कॉलनीतील विघ्नहर्ता गणेश मंडळात गणपती स्थापनेची तयारी सुरू होती. महाजन कुटुंबीयांसह कॉलनीतील नागरिक गणपती स्थापनेसाठी एकत्र जमले होते. त्यावेळी हेमांगी यांना बोलविण्यासाठी कुटुंबातील सदस्य घरी गेले. मात्र घराचा दरवाजा बंद होता. बराच वेळ आवाज देऊनही आतून कोणताही प्रतिसाद मिळाला नाही.
त्यामुळे शनिपेठ पोलिसांना माहिती देण्यात आली. पोलिस निरीक्षक डॉ. विशाल जयस्वाल यांच्यासह सहकारी घटनास्थळी दाखल झाले. पोलिसांनी दरवाजा उघडल्यानंतर हेमांगी आणि त्यांचा मुलगा शौर्य गळफास घेतलेल्या अवस्थेत आढळले. दोघांना तातडीने शासकीय वैद्यकीय महाविद्यालय व रुग्णालयात दाखल करण्यात आले. मात्र डॉक्टरांनी तपासणी करून दोघांनाही मृत घोषित केले.
मयत हेमांगी यांचे दीर अक्षय महाजन हे तळेले कॉलनीतील विघ्नहर्ता गणेश मंडळाचे अध्यक्ष आहेत. महाजन कुटुंबातील सर्व सदस्यांचा मंडळाच्या विविध उपक्रमांमध्ये सक्रिय सहभाग असतो. गणेश चतुर्थीच्या दिवशीच ही घटना घडल्याने कॉलनीतील नागरिकांना मोठा धक्का बसला.
हेमांगी यांचे माहेर बांभोरी येथील आहे. त्यांच्या वडिलांचे अवघ्या दोन महिन्यांपूर्वीच निधन झाले होते. त्यानंतर आता हेमांगी आणि नातू शौर्य यांच्या मृत्यूची बातमी समजल्याने त्यांच्या आईवर दुःखाचा डोंगर कोसळला आहे.
