विशेष प्रतिनिधी जळगाव : पाचोरा शहरातील भडगाव रोडवर असलेल्या कृषी उत्पन्न बाजार समिती परिसरातील एका ऑटो गॅरेजमधून ७७ हजार ५०० रुपयांची रोख रक्कम चोरून नेल्याची घटना समोर आली आहे. या प्रकरणी पाचोरा पोलीस ठाण्यात अज्ञात चोरट्याविरोधात गुन्हा दाखल करण्यात आला आहे.
दिनेश निलेश सोनवणे (वय ३०, व्यवसाय-सलून, रा. बनोटी, ता. सोयगाव, जि. छत्रपती संभाजीनगर) यांनी दिलेल्या फिर्यादीवरून हा गुन्हा नोंदवण्यात आला आहे.
पोलिसांनी दिलेल्या माहितीनुसार, फिर्यादी दिनेश सोनवणे हे १९ ऑगस्ट २०२६ रोजी दुपारी दोन वाजेच्या सुमारास पाचोरा येथील भडगाव रोडवरील ‘स्वराज ऑटो गॅरेज’ येथे गेले होते. त्यांनी गॅरेजमध्ये ठेवलेल्या एका कापडी पिशवीत ७७ हजार ५०० रुपयांची रोकड (५००, २००, १०० आणि ५० रुपयांच्या नोटा) ठेवली होती.
दरम्यान, कोणाचेही लक्ष नसताना अज्ञात चोरट्याने ती कापडी पिशवी आणि त्यातील रोख रक्कम चोरून नेली. फिर्यादी व त्यांच्या साथीदारांनी २१ ऑगस्टपर्यंत या रक्कमेचा आणि संशयिताचा शोध घेतला; मात्र काहीही सुगावा न लागल्याने अखेर त्यांनी पोलिसांत धाव घेतली.
फिर्यादीच्या अर्जावरून २१ ऑगस्ट रोजी पाचोरा पोलीस ठाण्यात भारतीय न्याय संहिता (BNS) कलम ३०३(२) अन्वये चोरीचा गुन्हा दाखल करण्यात आला आहे.
पाचोरा पोलीस ठाण्याचे पोलीस निरीक्षक राहुलकुमार पवार यांच्या मार्गदर्शनाखाली पोलीस हवालदार राहुल शिंपी या प्रकरणाचा पुढील तपास करत आहेत.
