जळगाव, (प्रतिनिधी) : जळगाव तालुका पोलीस स्टेशनच्या हद्दीत गेल्या काही दिवसांपासून घरफोडी आणि वाहन चोरी करणाऱ्या टोळीचा पर्दाफाश करण्यात पोलिसांना मोठे यश आले आहे. पोलिसांनी ५ अट्टल आरोपींना अटक केली असून, त्यांच्याकडून तब्बल १० गुन्ह्यांची उकल करण्यात आली आहे. आरोपींकडून एकूण ४ लाख ३० हजार रुपये किमतीचा मुद्देमाल हस्तगत करण्यात आला आहे.
गेल्या काही दिवसांपासून घरफोडीच्या घटनांमुळे नागरिकांमध्ये भीतीचे वातावरण होते. याची गंभीर दखल घेत पोलीस अधीक्षक श्रीकांत धिवरे यांच्या मार्गदर्शनाखाली पोलीस निरीक्षक शशिकांत पाटील व त्यांच्या पथकाने गुप्त माहिती आणि तांत्रिक विश्लेषणाच्या आधारे सापळा रचून ५ आरोपींना ताब्यात घेतले. यामध्ये टोळीचा मुख्य मोहरक्या गुरुजीत सिंग सुजानसिंग बावरी (वय २६), दीपक बापू पाटील (वय २३), राजेश माणिक राठोड (वय २४), सुमित संजय कोळी (वय १९) आणि महेश उर्फ संतोष भोई (वय २४) सर्व रा. जळगाव यांचा समावेश आहे.
ताब्यात घेतलेल्या आरोपींनी जळगाव तालुका पोलीस स्टेशन हद्दीतील एकूण ९ घरफोड्या आणि १ मोटार वाहन चोरीची कबुली दिली आहे. पोलिसांनी त्यांच्याकडून २ लाख ३० हजार रुपये किमतीचा घरफोडीतील मुद्देमाल आणि २ लाख रुपये किमतीच्या ४ मोटार सायकली असा एकूण ४ लाख ३० हजारांचा मुद्देमाल जप्त केला आहे. मुख्य आरोपी गुरुजीतसिंग बावरी हा रेकॉर्डवरील अट्टल गुन्हेगार असून त्याच्यावर यापूर्वी १३ गंभीर गुन्हे दाखल आहेत. तसेच त्याच्यावर एमपीडीए (MPDA) अंतर्गत कारवाई करून एक वर्षासाठी नागपूर मध्यवर्ती कारागृहात स्थानबद्ध करण्यात आले होते. कारागृहातून सुटल्यानंतर त्याने पुन्हा घरफोड्यांचे सत्र सुरू केले होते, ज्याला पोलिसांनी आता बेड्या ठोकल्या आहेत. या धडक कारवाईमुळे नागरिकांमध्ये सुरक्षिततेची भावना निर्माण झाली आहे.
सदरची कामगिरी पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उप विभागीय पोलीस अधिकारी नितीण गणापुरे यांच्या मार्गदर्शनाखाली जळगाव तालुका पोलीस स्टेशनचे पोलीस निरीक्षक शशिकांत पाटील, सहाय्यक पोलीस निरीक्षक नयन पाटील, पोलीस उपनिरीक्षक विजय पाटील, प्रोफेशनरी पोलीस उपनिरीक्षक यज्ञजीता येडले, पोहेकॉ प्रदीप राजपूत तसेच गुन्हे शोध पथकाचे पोलीस हवालदार अविनाश देवरे, योगेश पाटील, नरेंद्र पाटील, श्रीकांत बदर, पोलीस नाईक कैलास इंगळे, पोलीस कॉन्स्टेबल प्रशांत ठाकूर, शरद पाटील, दिपक देवरे आणि वाहन चालक पोलीस हवालदार अशोक पाटील व पंकज देशमुख या पथकाने उत्कृष्ट व उल्लेखनीय कामगिरी केली आहे.
