जळगाव, (प्रतिनिधी) : रंगभूमीवरील कलावंतांच्या आरोग्याची काळजी घेण्याच्या उद्देशाने, स्व. ज्ञानेश्वर गायकवाड यांच्या स्मृतिप्रित्यर्थ ‘जीवनरंग विनामूल्य आरोग्य तपासणी शिबिराचे’ नुकतेच यशस्वी आयोजन करण्यात आले होते. बालरंगभूमी परिषद जळगाव जिल्हा शाखा, अरुश्री हॉस्पिटल आणि मुक्ती फाउंडेशन यांच्या संयुक्त विद्यमाने या विशेष शिबिराचे आयोजन करण्यात आले होते.
शिबिराच्या उद्घाटन प्रसंगी मान्यवरांच्या हस्ते नटराज पूजन करून आरोग्य तपासणीला अधिकृत सुरुवात झाली. याप्रसंगी डॉ. स्वाती बाविस्कर, मुकुंद गोसावी, बालरंगभूमी परिषद जळगावचे अध्यक्ष योगेश शुक्ल, कार्यवाह विनोद ढगे, उपाध्यक्ष पंकज बारी, नेहा पवार-गुजराथी, सचिन महाजन आदी मान्यवर उपस्थित होते.
या शिबिरात डॉ. परिक्षीत बाविस्कर यांच्या मार्गदर्शनाखाली डॉ. स्वाती बाविस्कर यांनी उपस्थित कलावंतांची आरोग्य तपासणी केली. तसेच त्यांनी उपस्थितांना आरोग्य विषयक घ्यावयाची काळजी आणि औषधोपचार घेताना पाळावयाचे नियम याविषयी अत्यंत मोलाचे मार्गदर्शन केले.
विविध चाचण्यांसह औषधांचे मोफत वितरण..
शिबिरादरम्यान डॉ. स्वाती बाविस्कर, डॉ. हर्ष चौधरी, राहुल बनसोडे व अरुश्री हॉस्पिटलमधील आरोग्यसेवकांच्या पथकाने सहभागी कलावंतांची सीबीसी रक्त तपासणी, रक्तातील साखर तपासणी (ब्लड शुगर), रक्तदाब (बीपी) आणि ईसीजी (ECG) यांसारख्या महत्त्वाच्या शारीरिक तपासण्या केल्या. तपासणीनंतर रुग्णांना आवश्यक त्या औषधांचे विनामूल्य वितरणही करण्यात आले. शहरातील एकूण ३८ कलावंतांनी या आरोग्य शिबिराचा प्रत्यक्ष लाभ घेतला.
कार्यक्रमाचे सूत्रसंचालन आणि उपस्थितांचे आभार प्रदर्शन विनोद ढगे यांनी केले. हे शिबिर यशस्वी पार पाडण्यासाठी बालरंगभूमी परिषदेचे दीपक महाजन, मोहित पाटील, ज्ञानेश्वर सोनवणे, दर्शन गुजराथी आणि राहुल पवार यांनी विशेष परिश्रम घेतले. या उपक्रमाचे कलावंत वर्गातून कौतुक होत आहे.
