जळगाव, (प्रतिनिधी) : महाराष्ट्र एसटी कामगार सेनेचे राज्य उपाध्यक्ष तथा एसटी महामंडळाचे लिपिक (स्थापत्य शाखा) आर. के. पाटील यांचा ३७ वर्षांच्या प्रदीर्घ सेवेनंतरचा सेवानिवृत्ती व कृतज्ञता सोहळा जळगावात अत्यंत मंगलमय वातावरणात संपन्न झाला. २६ जून रोजी येथील संतबाबा हरदासराम समाज कार्यालयात आयोजित या दिमाखदार सोहळ्याला राज्याचे पाणीपुरवठा व स्वच्छता मंत्री तथा पालकमंत्री ना. गुलाबराव पाटील प्रमुख अतिथी म्हणून उपस्थित होते. त्यांच्या हस्ते आर. के. पाटील यांचा सपत्नीक भावपूर्ण सत्कार करण्यात आला.
याप्रसंगी बोलताना पालकमंत्री गुलाबराव पाटील यांनी एसटी महामंडळ आणि कर्मचाऱ्यांच्या योगदानाचा गौरव केला. ते म्हणाले, “महाराष्ट्र राज्य मार्ग परिवहन महामंडळ हे आशिया खंडातील पहिल्या क्रमांकाचे महामंडळ असून ते राष्ट्रीय एकात्मतेचे प्रतीक आहे. एसटी ही महाराष्ट्राची केवळ जीवनवाहिनी नसून रक्तवाहिनी आहे. ‘गाव तेथे रस्ता आणि रस्ता तेथे एसटी’ ही शासकीय संकल्पना प्रत्यक्षात आणण्याचे खरे श्रेय ऊन-पावसाची तमा न बाळगता सर्व जाती-धर्माच्या प्रवाशांची सेवा करणाऱ्या एसटी कर्मचाऱ्यांनाच जाते.” आर. के. पाटील यांनी महामंडळात ३७ वर्षे निष्कलंक सेवा देतानाच कामगारांचे प्रश्न सोडवण्यासाठी दिलेले योगदान कौतुकास्पद असल्याचे सांगत ना. पाटलांनी त्यांच्या भावी आयुष्यासाठी शुभेच्छा दिल्या.
या सोहळ्याला राजकीय, सामाजिक आणि एसटी महामंडळातील अनेक दिग्गज नेत्यांची मांदियाळी जमली होती. व्यासपीठावर खासदार स्मितात वाघ, माजी परिवहन मंत्री डॉ. सतीश पाटील, माजी परिवहन मंत्री गुलाबराव देवकर, आमदार प्रा. चंद्रकांत सोनवणे, आमदार सुरेश भोळे (राजू मामा), महापौर दीपमाला काळे, आमदार किशोर पाटील, आमदार चंद्रकांत पाटील, जळगाव विभागाचे विभाग नियंत्रक प्रज्ञेश बोरसे, माजी उपमहाव्यवस्थापक सोपानराव नाबदे, आणि उपाध्यक्ष व व्यवस्थापकीय संचालकांचे माजी स्वीय सहाय्यक माधव देवधर उपस्थित होते.
तसेच महाराष्ट्र एसटी कामगार सेनेचे उपाध्यक्ष किरण बिडवे, संघटक सचिव सुभाष जाधव, सेवानिवृत्त कर्मचारी युनियनचे गुलाब शेख, सुरेश चांगरे, गोपाल पाटील, विनोद शितोळे, प्रशांत मोरे, सागर निकुंभ, खुशाल मोरे, शैलेश नन्नवरे यांच्यासह एसटी महामंडळ जळगाव विभागातील सर्व अधिकारी आणि आजी-माजी कर्मचारी मोठ्या संख्येने उपस्थित होते. कार्यक्रमाच्या यशस्वीतेसाठी एसटी महामंडळातील सर्व युनियनचे पदाधिकारी व सभासदांनी परिश्रम घेतले. कार्यक्रमाचे आभार प्रदर्शन डी. बी. महाजन यांनी केले.
