जळगाव, (प्रतिनिधी) : तालुक्यातील शिरसोली प्र. न. येथील कुऱ्हाडदे रस्त्यावरील इंदिरानगर भागातील सार्वजनिक शौचालय अत्यंत जीर्ण झाले असून, ते हटवून अन्यत्र उभारण्याच्या मागणीसाठी ग्रामस्थ आक्रमक झाले आहेत. या शौचालयातून येणारी भयानक दुर्गंधी आणि सेफ्टी टँकमधून बाहेर पडणाऱ्या मैल्यामुळे परिसरातील नागरिकांचे आरोग्य धोक्यात आले आहे.
विशेष म्हणजे, या शौचालयाच्या शेजारीच खोखली मातेचे मंदिर आणि दाट निवासी वस्ती असल्याने स्थानिक रहिवाशांना मोठा त्रास सहन करावा लागत आहे. यापूर्वी येथील उघड्या खड्ड्यात गाय पडून जखमी झाल्याची घटना घडली असूनही ग्रामपंचायत प्रशासनाने याकडे साफ दुर्लक्ष केले आहे.
हे शौचालय कोसळून मोठी दुर्घटना घडण्याची भीती व्यक्त होत असल्याने, ग्रामपंचायत व जिल्हा परिषद प्रशासनाने हे जीर्ण शौचालय तातडीने पाडून नवीन जागी उभारावे; अन्यथा तीव्र आंदोलन छेडण्याचा इशारा परिसरातील नागरिकांनी दिला आहे.
