जळगाव, (प्रतिनिधी) : जळगाव महापालिकेत कचऱ्याचे वजन करण्यासाठी वजनकाटा बसवताना आणि त्याच्या देखभालीत मोठ्या प्रमाणावर भ्रष्टाचार झाल्याचा थेट आरोप उपमहापौर मनोज चौधरी यांनी केला आहे. शासनाचे स्पष्ट निर्देश डावलून महापालिकेच्या आरोग्य विभागाने आर्थिक गैरव्यवहार केल्याचा संशय त्यांनी व्यक्त केला असून, यात एकूण ७ लाख ५८ हजार रुपयांचा घोटाळा झाल्याची शंका उपस्थित केली आहे.
कमी क्षमतेचा काटा, जास्त खर्च..
शासनाने ५० टन क्षमतेचा वजनकाटा ५ लाख ७१ हजार रुपयांत बसवण्याचे निर्देश दिले असताना, मनपाने तब्बल ९ लाख ५० हजार रुपये खर्च करून केवळ ३० टन क्षमतेचे दोन वजनकाटे बसवले. टी.बी. हॉस्पिटल आणि कचरा डेपो येथे हे काटे बसवण्यात आले होते. त्यापैकी टी.बी. हॉस्पिटल येथील काटा ई-बस चार्जिंग स्टेशनमुळे काढण्यात आला, मात्र तो सध्या कुठे आहे याचे उत्तर अधिकारी देत नाहीत. गेल्या दोन वर्षांपासून हा काटा बंद असल्याने खासगी वजनकाट्यावर कचऱ्याचे वजन केले जात आहे. यासाठी मागील ६ ते ७ महिन्यांत खासगी काटा मालकाला १३ लाख ३७ हजार रुपये मोजण्यात आले असून आणखी काही महिन्यांचे बिल देणे बाकी आहे.
कचरा डेपोवरील मनपाचा स्वतःचा काटाही अनेक वर्षांपासून बंद आहे. त्याच्या दुरुस्तीसाठी ३ लाख ९७ हजार रुपयांचा खर्च अपेक्षित असताना, मनपाकडे स्वतःचा काटा दुरुस्त करायला पैसे नाहीत; मात्र खासगी चालकाला लाखो रुपये देण्यासाठी पैसे उपलब्ध आहेत. खासगी काट्यावर वजन केल्यास भ्रष्टाचार करणे सोपे जाते, म्हणूनच अधिकारी जाणूनबुजून स्वतःचा काटा दुरुस्त करत नसल्याचा आरोप उपमहापौरांनी केला आहे. इतका मोठा खर्च खासगी व्यक्तीवर करण्यापेक्षा मनपाने स्वतःचे दोन नवीन काटे बसवले असते, असा सवाल त्यांनी केला.
आरोग्य विभागाच्या संगणमताने कर्मचारी गायब..
याशिवाय, मनपा इमारतीमधील ८ कर्मचाऱ्यांपैकी २ कर्मचारी गेल्या १५ दिवसांपासून कोणतीही रजा न घेता बेकायदेशीरपणे गैरहजर आहेत. त्यांच्यावर देखरेख ठेवण्यासाठी दोन मुकादम असतानाही कोणतीही कारवाई झालेली नाही. हा सर्व प्रकार आरोग्य विभागातील अधिकाऱ्यांच्या संगनमताने सुरू असल्याचे स्पष्ट होत असून, मनपा आयुक्तांनी या संपूर्ण प्रकरणाची चौकशी करून संबंधित दोषी अधिकाऱ्यांवर कडक कारवाई करावी, अशी मागणी उपमहापौर मनोज चौधरी यांनी केली आहे.
