जळगाव, (प्रतिनिधी) : तुझ्या भावाला मारून टाकेल अशी भीती दाखवून एका १८ वर्षीय महाविद्यालयीन तरुणीवर वेळोवेळी अत्याचार केल्याची धक्कादायक घटना जळगाव शहरात उघडकीस आली आहे. या प्रकरणी पीडित विद्यार्थिनीच्या तक्रारीवरून एमआयडीसी पोलीस ठाण्यात एका संशयित तरुणाविरुद्ध बलात्काराचा गुन्हा दाखल करण्यात आला आहे.
शाकीब अस्लम पटेल (वय २०, रा. तांबापुरा, जळगाव) असे गुन्हा दाखल झालेल्या संशयित आरोपीचे नाव आहे.
याबाबत पोलिसांकडून मिळालेली माहिती अशी की, एमआयडीसी पोलीस ठाण्याच्या हद्दीतील एका परिसरात राहणारी १८ वर्षीय तरुणी जळगाव शहरात महाविद्यालयीन शिक्षण घेते. संशयित आरोपी शाकीब पटेल याने तरुणीला तिच्या भावाला जीवे मारण्याची धमकी दिली होती. या धमकीच्या बळावर त्याने पीडितेचा गैरफायदा घेत तिला वेळोवेळी आपल्या घरी बोलावून तिच्यावर अत्याचार केला. हा संतापजनक प्रकार १ नोव्हेंबर २०२५ पासून ते २० मे २०२६ पर्यंत सुरू होता.
या सततच्या अत्याचारामुळे पीडित तरुणी गर्भवती राहिली. ही बाब लक्षात आल्यानंतर संशयित शाकीब याने तरुणीला जबरदस्तीने गर्भपाताच्या गोळ्या आणून दिल्या आणि त्या घेण्यास भाग पाडले. या मानसिक आणि शारीरिक त्रासाला कंटाळून अखेर पीडित विद्यार्थिनीने २१ मे रोजी एमआयडीसी पोलीस ठाणे गाठून फिर्याद दिली. त्यानुसार आरोपी शाकीब पटेल याच्याविरुद्ध बलात्काराचा गुन्हा दाखल करण्यात आला असून, पोलीस पुढील तपास करत आहेत.
