जळगाव, (प्रतिनिधी) : येथील महादेव हॉस्पिटल अँड रिसर्च सेंटरमध्ये अत्याधुनिक ‘इंटरव्हेन्शनल रेडिओलॉजी’ सेवा कार्यान्वित करण्यात आली आहे. या आधुनिक सुविधेमुळे आता जळगाव व परिसरातील रुग्णांना जटिल उपचारांसाठी मुंबई किंवा पुण्यासारख्या शहरात जाण्याची आवश्यकता उरणार नाही, अशी माहिती रुग्णालय प्रशासनाने दिली.
सुप्रसिद्ध इंटरव्हेन्शनल रेडिओलॉजिस्ट डॉ. किरण पाटील आणि डॉ. पावन चोरडिया यांच्या मार्गदर्शनाखाली हा विभाग सुरू झाला आहे. या विभागात युटेरिन फायब्रॉईड एम्बोलायझेशन, व्हेरिकोज व्हेन्सवर लेसर व ग्लू उपचार, अँजिओग्राफी, अँजिओप्लास्टी, डायलिसिस फिस्टुला, ट्यूमर एम्बोलायझेशन, इमेज गाईडेड बायोप्सी, बायलीरी ड्रेनेज, स्टेंटिंग आणि डीव्हीटी इंटरव्हेन्शन्स यांसारख्या विविध उपचार प्रक्रिया केल्या जाणार आहेत.
इंटरव्हेन्शनल रेडिओलॉजी ही विज्ञानाची एक आधुनिक शाखा असून, यात मोठ्या शस्त्रक्रियेविना केवळ एका सूक्ष्म छिद्राद्वारे शरीरातील गुंतागुंतीच्या आजारांवर उपचार केले जातात. यामुळे रुग्णांना कमी वेदना होतात, रक्तस्त्राव कमी होतो आणि हॉस्पिटलमधून लवकर डिस्चार्ज मिळून रुग्ण वेगाने बरा होतो. महादेव हॉस्पिटलमध्ये आता अनुभवी तज्ज्ञ आणि प्रगत तंत्रज्ञान एकाच छताखाली उपलब्ध झाल्याने जळगावकरांना मोठा दिलासा मिळाला आहे.
