जळगाव, (प्रतिनिधी) : नवापूर परिसरात पोल्ट्री फार्ममध्ये बर्ड फ्लूचा संसर्ग वेगाने वाढत असल्याच्या पार्श्वभूमीवर, जळगाव शहराच्या सुरक्षिततेसाठी उपमहापौर मनोज सुरेश चौधरी यांनी महानगरपालिकेच्या आरोग्य विभागाची तातडीची आढावा बैठक घेतली. शहरात कोणत्याही प्रकारचा प्रादुर्भाव होऊ नये, यासाठी प्रतिबंधात्मक उपाययोजना युद्धपातळीवर राबविण्याचे निर्देश त्यांनी यावेळी दिले.
बैठकीत उपमहापौरांनी शहरातील सर्व चिकन दुकाने, मांस विक्री केंद्रे आणि पोल्ट्री फार्मचे विशेष सर्वेक्षण करण्याचे आदेश दिले आहेत. तसेच, बाहेरील जिल्ह्यांतून विशेषतः नवापूरसारख्या बाधित भागातून येणाऱ्या पोल्ट्री वाहनांची कडक तपासणी करण्याच्या सूचनाही देण्यात आल्या आहेत.
प्रशासनाला दिलेले महत्त्वाचे निर्देश:
▪️विशेष पथकांची नियुक्ती: संशयास्पद परिस्थिती हाताळण्यासाठी आरोग्य विभागाची विशेष पथके तैनात करण्यात आली असून, मृत किंवा आजारी पक्षी आढळल्यास त्यांची वैज्ञानिक पद्धतीने विल्हेवाट लावण्याचे आदेश दिले आहेत.
▪️स्वच्छता व निर्जंतुकीकरण: चिकन मार्केट व कत्तलखान्यांमध्ये नियमित फवारणी आणि सॅनिटायझेशन करण्याच्या सूचना आरोग्य विभागाला देण्यात आल्या आहेत.
▪️नागरिकांमध्ये जनजागृती: नागरिकांनी अफवांवर विश्वास ठेवू नये आणि मांस किंवा अंडी पूर्णपणे शिजवूनच सेवन करावी, याबाबत जनजागृती मोहीम राबविण्यात येणार आहे.
▪️रुग्णालयांना सतर्कता: शहरातील आरोग्य केंद्रांना आवश्यक औषधसाठा आणि सुरक्षा साहित्य उपलब्ध ठेवण्याचे निर्देश देण्यात आले असून, श्वसनाचे त्रास असलेल्या रुग्णांवर विशेष लक्ष देण्यास सांगितले आहे.
जळगावच्या नागरिकांच्या आरोग्याशी कोणतीही तडजोड केली जाणार नाही. प्रशासकीय कामात हलगर्जीपणा आढळल्यास संबंधितांवर कठोर कारवाई केली जाईल.
– मनोज सुरेश चौधरी, उपमहापौर
