जळगाव (प्रतिनिधी) : तालुक्यातील फुपनगरी येथून हळदीचा कार्यक्रम आटोपून घरी परतत असताना झालेल्या भीषण दुचाकी अपघातात एका ४४ वर्षीय व्यक्तीचा दुर्दैवी मृत्यू झाला. सुरेश विठ्ठल मोरे (रा. राजमालती नगर, जळगाव) असे मृत व्यक्तीचे नाव आहे. ही घटना ५ मे रोजी खेडी फाट्याजवळ घडली.
मिळालेल्या माहितीनुसार, सुरेश मोरे हे फुपनगरी येथे एका नातेवाईकाच्या हळदीच्या कार्यक्रमासाठी गेले होते. कार्यक्रम संपवून रात्रीच्या सुमारास ते आपल्या दुचाकीने जळगावकडे परतत होते. खेडी फाट्याजवळील एका वळणावर त्यांचा दुचाकीवरील ताबा सुटला आणि दुचाकी थेट रस्त्याच्या कडेला असलेल्या ज्वारीच्या शेतात जाऊन आदळली.
हा अपघात इतका भीषण होता की, सुरेश मोरे यांना शरीरावर आणि डोक्याला गंभीर जखमा झाल्या. या अपघातात त्यांचा जागीच मृत्यू झाला. घटनेची माहिती मिळताच परिसरात हळहळ व्यक्त केली जात आहे.
या प्रकरणी मयताचे भाऊ किरण मोरे यांनी तालुका पोलीस ठाण्यात फिर्याद दिली आहे. त्यांच्या फिर्यादीवरून पोलिसांनी अपघाताची नोंद केली असून गुन्हा दाखल केला आहे. या प्रकरणाचा पुढील तपास पोलीस हेड कॉन्स्टेबल धनराज पाटील करत आहेत.
