जळगाव, (प्रतिनिधी) : तालुक्यातील शिरसोली प्र.बो. येथील शिक्षक कॉलनी परिसरात चोरीची एक मोठी घटना समोर आली आहे. स्टॅम्प वेंडर राजेंद्र दौलत आंबटकर (बारी) यांचे घर बंद असल्याचे पाहून अज्ञात चोरट्यांनी घराचा कडी-कोयंडा कापून आत प्रवेश केला आणि घरातील सुमारे पाच लाख रुपये किमतीचा सोन्या-चांदीचा ऐवज व रोख रक्कम लंपास केली. या घटनेमुळे संपूर्ण परिसरात भीतीचे व खळबळीचे वातावरण पसरले आहे.
राजेंद्र आंबटकर हे व्यवसायाने स्टॅम्प वेंडर असून, ते आपल्या पत्नीसह गेल्या शुक्रवारी (१ मे) वैयक्तिक कामासाठी पुणे येथे गेले होते. दरम्यानच्या काळात त्यांचे घर बंद होते. हीच संधी साधून चोरट्यांनी घराच्या मुख्य दरवाजाचा कडी-कोयंडा शिताफीने कापला आणि घरात शिरकाव केला. आज, मंगळवारी (५ मे) सकाळी ७ वाजेच्या सुमारास आंबटकर कुटुंब पुण्याहून घरी परतले. त्यावेळी त्यांना घराचा दरवाजा अर्धवट उघडा असल्याचे दिसून आले. आत प्रवेश केल्यावर घरातील सामानाची मोठी उलाढाल झालेली दिसली, तेव्हा त्यांना चोरी झाल्याचा धक्कादायक प्रकार लक्षात आला.
चोरट्यांनी घराची कसून झडती घेतली होती. विशेष म्हणजे, आंबटकर यांनी सुरक्षिततेसाठी धान्याच्या कोठीत लपवून ठेवलेले दागिनेही चोरट्यांनी शोधून काढले. यात दोन तोळ्याची मंगल पोत, दीड तोळा वजनाची चैन, ५ ग्रॅमचे झुमके असे सोन्याचे दागिने आणि १५ हजार रुपये रोख रक्कम असा एकूण ५ लाख रुपयांचा मुद्देमाल चोरीला गेला आहे.
चोरीची माहिती मिळताच सामाजिक कार्यकर्ते अर्जुन पवार यांनी तातडीने एमआयडीसी पोलिसांशी संपर्क साधला. घटनेचे गांभीर्य लक्षात घेऊन एमआयडीसी पोलीस ठाण्याचे पीएसआय राहुल तायडे, प्रदीप चौधरी, धनराज गुळवे, चेतन पाटील आणि शिरसोलीचे पोलीस पाटील श्रीकृष्ण बारी यांनी घटनास्थळी धाव घेत पंचनामा केला. तपासाला गती देण्यासाठी पोलीस कर्मचारी मनोज पाटील व नाना मोरे यांनी ‘चॅम्प’ या पोलीस श्वानाला पाचारण करण्यात आले होते. तसेच ठसे तज्ज्ञ एपीआय पांडुरंग फळ आणि पोलीस हेडकॉन्स्टेबल सचिन चौधरी यांनी घटनास्थळावरून चोरट्यांचे फिंगरप्रिंट्स (ठसे) घेतले आहेत. याप्रकरणी एमआयडीसी पोलीस ठाण्यात गुन्हा दाखल करण्याची प्रक्रिया सुरू होती.
