जळगाव, (प्रतिनिधी) : जळगाव जिल्हा क्रिकेट असोसिएशनतर्फे आयोजित ‘जळगाव क्रिकेट लिग-२०२६’ (JCL) स्पर्धेत सहाव्या दिवशी चुरशीचे सामने पाहायला मिळाले. पहिल्या सामन्यात चाळीसगाव एसपीसीसी चॅलेंजर्सने रावेर रॉयल्सचा पराभव करत आगेकूच केली, तर दुसऱ्या सामन्यात जळगाव कोगटा किंग्सने जामनेर सातपुडा हिरोजवर १०१ धावांनी दणदणीत विजय मिळवला.
चाळीसगावचा विजय, रावेर रॉयल्स स्पर्धेबाहेर..
प्रथम फलंदाजी करताना चाळीसगाव संघाने ५ बाद १८३ धावांचा डोंगर उभा केला. कर्णधार ओम मुंडे (८५ धावा) आणि साहिल गायकर (७७ धावा) यांनी दुसऱ्या विकेटसाठी केलेल्या शतकी भागीदारीमुळे संघाला भक्कम स्थिती प्राप्त झाली. रावेरच्या संदेश सुरवाडेने २ बळी घेतले.
१८४ धावांच्या लक्ष्याचा पाठलाग करताना रावेर रॉयल्सचा संघ १९.३ षटकांत १७५ धावांपर्यंतच मजल मारू शकला आणि अवघ्या ८ धावांनी सामना हरल्याने स्पर्धेतून बाहेर पडला. चाळीसगावच्या अमेय कोळी आणि सरज पाटील यांनी प्रत्येकी २ गडी बाद केले. अष्टपैलू कामगिरी करणाऱ्या ओम मुंडेला ‘मॅन ऑफ दी मॅच’ पुरस्काराने गौरविण्यात आले.
कोगटा किंग्सचा दबदबा; जामनेरचा डाव ८५ धावांत आटोपला..
दुसऱ्या सामन्यात जळगाव कोगटा किंग्सने फलंदाजी आणि गोलंदाजी दोन्ही विभागात वर्चस्व गाजवले. सलामीवीर ओम भोसले (६४) आणि जितेंद्र नाईक (६४) यांच्या १०२ धावांच्या सलामीच्या जोरावर कोगटा किंग्सने ८ बाद १९६ धावा केल्या. जामनेरच्या ललित पाटीलने ३ बळी घेतले.
१९७ धावांच्या आव्हानाचा पाठलाग करताना जामनेर सातपुडा हिरोजची अवस्था अत्यंत खराब झाली. कोगटा किंग्सच्या सागर भावर (३/१२), राज बेलदार आणि बिपिन चांगरे यांच्या भेदक माऱ्यासमोर जामनेरचा पूर्ण संघ १९.४ षटकांत केवळ ८५ धावांत गारद झाला. ओम भोसले याला ‘मॅन ऑफ दी मॅच’ घोषित करण्यात आले.
