जळगाव, (प्रतिनिधी) : जळगाव जिल्हा क्रिकेट असोसिएशनतर्फे आयोजित ‘जळगाव क्रिकेट लिग’ (JCL T-20) स्पर्धेत मंगळवारी झालेल्या अटीतटीच्या सामन्यांमध्ये जामनेर सातपुडा हिरोज आणि जळगाव कोगटा किंग्स या संघांनी शानदार विजय नोंदवले. तत्पूर्वी सोमवारी रात्री झालेल्या सामन्यात अमळनेर सुहांस जायंट्सने आपले वर्चस्व सिद्ध केले. या विजयांमुळे आता उपांत्य फेरीसाठी संघांमध्ये चुरस वाढली आहे.
जामनेर सातपुडा हिरोजचा ८ गडी राखून विजय
जामनेर आणि अमळनेर यांच्यातील सामन्यात अमळनेरने प्रथम फलंदाजी करताना शुभम शर्माच्या (६० धावा) खेळीमुळे १५२ धावांचे आव्हान ठेवले होते. प्रत्युत्तरात जामनेरच्या फलंदाजांनी आक्रमक सुरुवात केली. सामनावीर प्रद्युम महाजन याने अवघ्या ४२ चेंडूत ६९ धावा कुटल्या, तर रवींद्र (३१) आणि क्रिषी (३०) यांनी नाबाद भागीदारी करत १७.४ षटकांतच विजय खेचून आणला.
जळगाव कोगटा किंग्सचा रावेरवर विजय
रावेर रॉयल्सविरुद्धच्या सामन्यात जळगाव कोगटा किंग्सच्या गोलंदाजांनी शिस्तबद्ध कामगिरी केली. रावेरचा डाव १४३ धावांवर रोखण्यात कर्णधार जगदीश झोपे आणि बिपिन चावरे (प्रत्येकी २ बळी) यांना यश आले. १४४ धावांचे लक्ष्य गाठताना ओम भोसले (६४) आणि सामनावीर बिपिन चावरे (५२ धावा) यांनी फटकेबाजी करत अवघ्या १५.१ षटकांत जळगावला विजय मिळवून दिला.
अमळनेर सुहांस जायंट्सचा धावांचा डोंगर
सोमवारी रात्री झालेल्या सामन्यात अमळनेरने रावेर रॉयल्सविरुद्ध २० षटकांत ७ बाद २०१ धावांचा डोंगर उभारला होता. रणजीत निकम (५५), मानव टीब्रेवाला (५४) आणि ऋषी यादव (३७) यांनी तुफानी फलंदाजी केली. रावेर रॉयल्सला १६४ धावांपर्यंतच मजल मारता आली. अष्टपैलू कामगिरी करणाऱ्या रणजीत निकमला सामनावीर पुरस्काराने गौरविण्यात आले.
