जळगाव, (प्रतिनिधी) : जळगाव जिल्हा क्रिकेट असोसिएशनतर्फे आयोजित ‘जळगाव क्रिकेट लिग-२०२६’ मध्ये चुरशीच्या लढती पाहायला मिळत आहेत. कांताईनगर येथील जैन ड्रिम स्पेसेस मैदानावर पार पडलेल्या सामन्यांमध्ये पाचोरा, चाळीसगाव आणि सातपुडा हिरोज या संघांनी प्रतिस्पर्ध्यांवर मात करत विजय नोंदवला.
प्रमुख सामन्यांचा संक्षिप्त वृत्तांत..
पाचोरा एसकेटी योद्धाज वि. जळगाव कोकटा किंग्स:
प्रथम फलंदाजी करताना जळगाव कोकटा किंग्सने मनीष चव्हाणच्या (५८) खेळीच्या जोरावर १७५ धावा केल्या. प्रत्युत्तरात पाचोरा संघाने कैलास पाटील च्या (७७) झंझावाती फलंदाजीमुळे ७ गडी राखून विजय मिळवला. सलग दोन सामने जिंकणाऱ्या जळगाव कोकटा किंग्सचा हा मोसमातील पहिला पराभव ठरला.
चाळीसगाव एसपीसीसी चॅलेंजर वि. जामनेर सातपुडा हिरोज:
जामनेरने २० षटकांत १५८ धावा केल्या, ज्यात रवींद्रच्या ६८ धावांचा मोलाचा वाटा होता. मात्र, चाळीसगावच्या अमेय कोळीने (६६) दमदार फलंदाजी करत १९.३ षटकांत १६२ धावा पूर्ण केल्या आणि संघाला विजय मिळवून दिला.
सातपुडा हिरोज वि. रावेर रॉयल्स:
रविवारी रात्री झालेल्या सामन्यात सातपुडा हिरोजने १८२ धावांचा डोंगर उभा केला. मितेलेश चौधरीने (७०) केलेल्या शानदार खेळीमुळे रावेर रॉयल्सला केवळ ११४ धावांत रोखण्यात सातपुडाला यश आले. ६८ धावांनी विजय मिळवत मितेलेशने सामनावीर पुरस्कार पटकावला.
थेट प्रक्षेपणाची सुविधा..
जळगावकर क्रिकेट प्रेमींसाठी शहरातील काव्यरत्नावली चौक आणि नेहरू चौक येथे मोठ्या पडद्यावर सामन्यांचे थेट प्रक्षेपण करण्यात येत आहे. या सुविधेमुळे प्रेक्षकांचा उत्स्फूर्त प्रतिसाद लाभत असल्याची माहिती असोसिएशनचे अध्यक्ष अतुल जैन यांनी दिली.
