जळगाव, (प्रतिनिधी) : गुढीपाडव्याच्या पावन पर्वानिमित्त मेहरूण येथील छत्रपती शिवाजी चौक परिसरात हिंदू जनजागृती समितीतर्फे सामूहिक गुढी उभारण्याचा भव्य आणि उत्साहपूर्ण कार्यक्रम संपन्न झाला. या उपक्रमाला परिसरातील नागरिक, युवक व महिलांनी मोठ्या संख्येने हजेरी लावली, ज्यामुळे संपूर्ण परिसर भक्तीमय आणि मांगल्याच्या वातावरणाने न्हाऊन निघाला होता. कार्यक्रमाचा प्रारंभ माजी नगरसेवक प्रशांत नाईक व अर्चना प्रशांत नाईक यांच्या शुभहस्ते गुढीपूजन करून करण्यात आला. पारंपारिक पद्धतीने आणि शास्त्रोक्त विधीनुसार गुढी उभारल्यानंतर उपस्थितांनी एकमेकांना नववर्षाच्या शुभेच्छा दिल्या.
याप्रसंगी मार्गदर्शन करताना घनश्याम दहिवदकर यांनी सामूहिक गुढीचे महत्त्व विशद केले. ते म्हणाले की, “अशा उपक्रमांमुळे समाजात केवळ धार्मिक जागृतीच होत नाही, तर एकात्मतेची भावना देखील दृढ होते. आपले सण आणि उत्सव हे समृद्ध संस्कृतीचे जतन व संवर्धन करण्याचे प्रभावी माध्यम आहेत.” सामाजिक एकोप्याचा संदेश देणाऱ्या या उपक्रमाचे सर्वत्र कौतुक होत आहे.
या सोहळ्याला ओम शैलेश सूर्यवंशी, सनी किरण घुगे, गिरीश वाघ, प्रणव वंजारी, भूषण वाघ, आदित्य पाटील, देवेश सोनवणे, रोहित वंजारी, नीरज तायडे, अनिकेत वंजारी, प्रणव घुगे, करण वाघ, ओम वंजारी यांसह परिसरातील अनेक मान्यवर उपस्थित होते. कार्यक्रमाच्या यशस्वीतेसाठी हिंदू जनजागृती समितीच्या पदाधिकारी व कार्यकर्त्यांनी विशेष परिश्रम घेतले.
