जळगाव, (प्रतिनिधी) : विद्यार्थ्यांच्या शैक्षणिक प्रगतीला बळ देण्यासाठी आणि सदस्यांना अत्याधुनिक पायाभूत सुविधा उपलब्ध करून देण्यासाठी जळगाव सी.ए. शाखेने महत्त्वपूर्ण पाऊल उचलले आहे. याअंतर्गत भुसावळ व जळगाव येथे नवीन वाचन कक्षांचे उद्घाटन आणि जळगाव येथील आय.सी.ए.आय. भवनाच्या नूतनीकरण कार्याचा शुभारंभ नुकताच उत्साहात पार पडला.
यात भुसावळ येथे २५ आसनक्षमतेच्या वाचन कक्षाचे लोकार्पण करण्यात आले. तर जळगाव येथील के.सी.ई. सोसायटीच्या मुळजी जेठा महाविद्यालयात ३५ आसनक्षमतेच्या अतिरिक्त वाचन कक्षाचे उद्घाटन करण्यात आले. हे दोन्ही कक्ष वातानुकूलित असून, यामुळे विशेषतः ग्रामीण भागातील गरजू विद्यार्थ्यांना शांत आणि अभ्यासासाठी पोषक वातावरण उपलब्ध होणार आहे.
वाचन कक्षांच्या उद्घाटनासोबतच जळगाव येथील आय.सी.ए.आय. भवन येथे इमारत नूतनीकरण व सुशोभीकरण कामाचा श्रीगणेशा करण्यात आला. या प्रकल्पाद्वारे शाखेच्या पायाभूत सुविधांचे आधुनिकीकरण करून सदस्य व विद्यार्थ्यांसाठी अधिक चांगले व्यावसायिक वातावरण निर्माण करण्याचा मानस जळगाव सी.ए. शाखेचे अध्यक्ष सी.ए. हितेश आगीवाल यांनी व्यक्त केला.
आय.सी.ए.आय. भवन येथे “नाविन्यपूर्ण ग्रंथालय” सुरू करण्यात आले असून, यात भौतिक पुस्तकांसोबतच डिजिटल अभ्याससामग्री आणि अद्ययावत ज्ञानस्रोत उपलब्ध करून देण्यात आले आहेत. याच कार्यक्रमात जळगाव सी.ए. शाखेच्या नवीन संकेतस्थळाचे (Website) लोकार्पण महापौर दीपमाला काळे यांच्या हस्ते करण्यात आले.
“जळगाव सी.ए. शाखा विद्यार्थ्यांच्या शैक्षणिक प्रगतीसाठी आणि सदस्यांच्या विकासासाठी नेहमीच कटिबद्ध आहे. या नवीन सुविधांमुळे विशेषतः ग्रामीण भागातील विद्यार्थ्यांना सी.ए. परीक्षेत यश मिळवण्यासाठी मोठी मदत होईल.”
— सी.ए. हितेश आगीवाल (अध्यक्ष, जळगाव सी.ए. शाखा)
या विविध कार्यक्रमांसाठी महाराष्ट्र राज्याचे वस्त्र उद्योग मंत्री संजय सावकारे, महापौर दीपमाला काळे, उपमहापौर मनोज चौधरी, उपजिल्हाधिकारी जितेन्द्र कुवर, केंद्रीय परिषद सदस्य सी.ए. अर्पित काबरा प्रमुख पाहुणे म्हणून उपस्थित होते. तसेच मुळजी जेठा कॉलेजच्या शैक्षणिक संचालक डॉ. मृणालिनी फडणवीस, सी.ए. अब्दुल्ला अर्सिवाला, सी.ए. रोशन रुणवाल, सी.ए. लक्ष्मिकांत लाहोटी, सी.ए. करण काबरा, सी.ए. नचिकेत जाखेटीया आणि सी.ए. मुकेश अग्रवाल यांची विशेष उपस्थिती होती.
