जळगाव, (प्रतिनिधी) : जळगाव स्थानिक गुन्हे शाखा आणि पहूर पोलिसांनी वाकोड गावाजवळ संयुक्तपणे मोठी कारवाई करत तब्बल ६३ किलो ७१० ग्रॅम गांजा आणि दोन आलिशान कार असा एकूण २२ लाख ७४ हजार २०० रुपयांचा मुद्देमाल जप्त केला आहे. या प्रकरणी पोलिसांनी अमली पदार्थाची तस्करी करणाऱ्या सहा आरोपींना अटक केली असून त्यांच्याविरुद्ध एनडीपीएस कायद्यांतर्गत गुन्हा दाखल करण्यात आला आहे.
मिळालेल्या माहितीनुसार, जळगाव स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना गोपनीय माहिती मिळाली होती की, कारमधून गांजाची तस्करी केली जात आहे. या माहितीच्या आधारे स्थानिक गुन्हे शाखा व पहूर पोलीस स्टेशनच्या पथकाने वाकोड गावाच्या पुढे सापळा लावून संशयित कारचा पाठलाग केला आणि ती ताब्यात घेतली.
कारची तपासणी केली असता पोलिसांना त्यात तब्बल ६३ किलो ७१० ग्रॅम वजनाचा गांजा आढळला, ज्याची बाजारभावाप्रमाणे किंमत १२ लाख ७४ हजार २०० रुपये आहे. पोलिसांनी गांजासह गुन्ह्यात वापरलेली ७ लाख रुपये किमतीची सिल्व्हर रंगाची इनोव्हा आणि ३ लाख रुपये किमतीची पांढऱ्या रंगाची मारुती रिट्झ कार, असा एकूण २२ लाख ७४ हजार २०० रुपयांचा मुद्देमाल जप्त केला आहे.
या कारवाईत पोलिसांनी एकूण ६ आरोपींना अटक केली आहे. त्यात सागर संजय इंगवले (रा. नवी मुंबई), इरफान अक्रम शेख (रा. गोरेगाव, मुंबई), आणि अमन ताज खान (रा. वर्सोवा, मुंबई) यांचा समावेश असून, त्यांना गांजा पुरवल्याप्रकरणी नईम शेख याकुब, आबीद खान मेहमूद खान आणि तोहसिफ खान रसूल खान (सर्व रा. धुळे) यांनाही पोलिसांनी ताब्यात घेतले आहे.
ही कारवाई पोलीस अधीक्षक महेश्वर रेड्डी, अपर पोलीस अधीक्षक कविता नेरकर, आणि उपविभागीय पोलीस अधिकारी बापू रोहम यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड, सपोनि प्रमोद कठोरे, पीएसआय शरद बागल आणि त्यांच्या पथकाने यशस्वीरित्या पार पाडली. या पथकात सहा.फौ. अतुल वंजारी, पो.हे.कॉ. विजय पाटील,अक्रम शेख, नितीन बाविस्कर, पो.ना.अ. किशोर पाटील, पो.अ. रवींद्र कापडणे, राहुल रगड्ये, अजय पाटील, चापोशि प्रविण हिवराळे, दर्शन ठाकणे, ज्ञानेश्वर ठाकरे, दिपक पाटील, राहुल पाटील, सदिप धनगर, विनोद पाटील, चापोशि राहुल जोहरे यांचा समावेश होता. पुढील तपास पोलीस उपनिरीक्षक गणेश सुस्ते करत आहेत.
