जळगाव, (प्रतिनिधी) : महाराष्ट्र राज्याचे आराध्य दैवत छत्रपती शिवाजी महाराज यांच्या जन्मोत्सवानिमित्त जळगाव शहरात सर्वत्र उत्साहाचे वातावरण असून, यानिमित्ताने एका विशेष सोहळ्याचे आयोजन करण्यात आले आहे. “शिवराय मना-मनात, शिवजयंती घराघरात” या संकल्पनेतून येत्या १९ फेब्रुवारी रोजी, सायंकाळी ७ वाजता प्रभाग ७ मधील शिवकॉलनी स्टॉप परिसरात महाराजांच्या एका भव्य-दिव्य प्रतिकृतीचा अनावरण व दर्शन सोहळा पार पडणार आहे.
या मंगलप्रसंगी जळगाव शहराचे आमदार राजूमामा भोळे, महापौर दिपमाला काळे, महापालिकेचे स्थायी समिती सदस्य तथा प्रभागातील नगरसेवक विशाल भोळे, नगरसेविका अंकिता पाटील आणि नगरसेवक चंद्रशेखर अत्तरदे यांची प्रमुख उपस्थिती राहणार आहे. शिवरायांचे जाज्वल्य विचार समाजातील प्रत्येक घटकापर्यंत आणि घराघरात पोहोचावेत, या उदात्त उद्देशाने या कार्यक्रमाचे आयोजन करण्यात आले आहे. या सोहळ्यात महाराजांच्या आकर्षक प्रतिकृतीचे विधीवत पूजन केले जाणार असून, ही प्रतिकृती शिवप्रेमींसाठी मोठा आकर्षणाचा केंद्रबिंदू ठरणार आहे.
या ऐतिहासिक सोहळ्याचे आयोजन सामाजिक कार्यकर्ते पंकज सुरेश पाटील तथा शिवनेरी ग्रुप यांच्या वतीने करण्यात आले आहे. तरी सर्व जळगावकर नागरिकांनी आणि शिवभक्तांनी मोठ्या संख्येने उपस्थित राहून या सोहळ्याची शोभा वाढवावी व दर्शनाचा लाभ घ्यावा, असे आवाहन आयोजकांच्या वतीने करण्यात आले आहे.
