जळगाव, (प्रतिनिधी) : ग्रामीण भागातील मुलांमध्ये वाचनाची गोडी निर्माण व्हावी आणि त्यांच्या शिक्षणाला हातभार लागावा, या उदात्त हेतूने लीनेस क्लब जळगाव तर्फे आवार (ता. जळगाव) येथील ‘माय माती फाउंडेशन’ संचलित वाचन कट्ट्याला शालेय साहित्य प्रदान करण्यात आले.
प्रभावती पाटील यांच्या कार्याचे कौतुक..
याप्रसंगी वाचन कट्ट्याच्या संचालिका प्रभावती पाटील यांच्या कार्याची पाहणी क्लबच्या सदस्यांनी केली. प्रतिकूल परिस्थितीत ग्रामीण मुलांसाठी त्या राबवत असलेला हा उपक्रम पाहून उपस्थितांनी त्यांचे विशेष कौतुक केले. या उपक्रमासाठी अनुजा गुंजन बोथरा यांचे मोलाचे आर्थिक सहकार्य लाभले.
या कार्यक्रमाला लीनेस क्लबच्या अध्यक्षा रेखा वर्मा, सचिव नीला चौधरी, माजी अध्यक्षा रेश्मा बेहराणी, अनिता कांकरिया, अलका कांकरिया तसेच आवार गावचे सरपंच व ग्रामस्थ उपस्थित होते. दरम्यान क्लबच्या पदाधिकाऱ्यांनी वाचन कट्ट्यावरील मुलांशी संवाद साधून त्यांच्या प्रगतीचा आढावा घेतला. संचालिका प्रभावती पाटील यांनी वाचन कट्ट्याचे कामकाज, मुलांचा सहभाग आणि भविष्यातील गरजांबाबत सविस्तर माहिती दिली.
यावेळी बोलताना अनिता कांकरिया व अध्यक्षा रेखा वर्मा यांनी आश्वासन दिले की, “पुढील काळातही या वाचन कट्ट्याला किंवा मुलांना कोणत्याही शैक्षणिक साहित्याची आवश्यकता भासल्यास, लीनेस क्लबतर्फे ती पूर्ण करण्यासाठी सदैव प्रयत्न केले जातील.”
