जळगाव, (प्रतिनिधी) : शहरात गावठी कट्टा बाळगून दहशत निर्माण करणाऱ्या एका २१ वर्षीय तरुणाला स्थानिक गुन्हे शाखेने (LCB) सापळा रचून अटक केली आहे. त्याच्याकडून एक गावठी कट्टा आणि ३ जिवंत काडतुसे जप्त करण्यात आली असून, या कारवाईमुळे गुन्हेगारांचे धाबे दणाणले आहेत.
जळगाव जिल्ह्याचे पोलीस अधीक्षक डॉ. महेश्वर रेड्डी यांनी जिल्ह्यात अवैध अग्निशस्त्रांविरुद्ध मोहीम उघडली आहे. याच मोहिमेअंतर्गत दि. १० फेब्रुवारी २०२६ रोजी स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना गुप्त बातमीदारामार्फत महत्त्वाची माहिती मिळाली. मोहम्मद साद अय्युब खान (वय २१, रा. शाहूनगर, जळगाव) हा तरुण उस्मानिया पार्क, शिवाजीनगर भागात मोटारसायकलवर गावठी कट्टा घेऊन दहशत माजवत असल्याची खात्रीशीर माहिती पथकाला मिळाली होती.
मिळालेल्या माहितीनुसार, स्थानिक गुन्हे शाखेच्या पथकाने उस्मानिया पार्क परिसरात रात्रीच्या वेळी सापळा रचला. संशयित मोहम्मद साद खान हा परिसरात दिसताच पोलिसांनी त्यास शिताफीने ताब्यात घेतले. त्याची झडती घेतली असता त्याच्याकडे ०१ गावठी कट्टा आणि ०३ जिवंत काडतुसे मिळून आली. पोलिसांनी शस्त्रसाठ्यासह त्याची मोटारसायकलही जप्त केली आहे.
याप्रकरणी जळगाव शहर पोलीस ठाण्यात गुन्हा दाखल करण्यात आला आहे. अटकेतील आरोपीला पुढील कायदेशीर कारवाईसाठी जळगाव शहर पोलिसांच्या स्वाधीन करण्यात आले असून, पोलीस हवालदार सुनील पाटील या प्रकरणाचा अधिक तपास करत आहेत.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि स्थानिक गुन्हे शाखेचे पोलीस निरीक्षक राहुल गायकवाड यांच्या मार्गदर्शनाखाली करण्यात आली. पथकात पोलीस उपनिरीक्षक शरद बागल, सहाय्यक फौजदार अतुल वंजारी, विजय पाटील, अक्रम शेख, नितीन बावीस्कर, विलेश सोनवणे, किशोर पाटील आणि रवींद्र कापडणे यांचा समावेश होता.
